Azərbaycanın xalq artisti Polad Bülbüloğlu UNESCO-ya rəhbərlik edə bilər
Polad Bülbüloğlu
Azərbaycanın Rusiyadakı səfiri, xalq artisti Polad Bülbüloğlu BMT-nin təhsil, elm və mədəniyyət məsələləri üzrə (UNESCO) baş direktoru vəzifəsinə rəsmi namizəd olub. Seçkilər bu ilin payızında baş tutacaq.
Seçkilər baş direktor vəzifəsinə ilk dəfə 2009-cu ildə və təkrar 2013-cü ildə seçilmiş İrinaBokovanın səlahiyyət müddətinin bitməsi ilə əlaqədar olaraq keçiriləcək. O, ümumdünya təşkilatının başına keçən ilk Şərqi Avropa təmsilçisi olub. UNECKO-nun qaydaları ən üst vəzifəli şəxsin iki dəfədən artıq seçilməsinə imkan vermir.
Polad Bülbül oğlu Məmmədov yalnız Azərbaycanda deyil, keçmiş SSRİ-də müğənni və bəstəkar kimi populyardır. O, iki onillik ərzində (1988-2006) Azərbaycanın Mədəniyyət naziri vəzifəsini tutub. 2006-cı ildən bu günə qədər Azərbaycan Respublikasının Rusiya Federasiyasındakı səfiridir.
Aprelin 1-dən gec olmayaraq UNESCO-nun İcra Şurası təşkilat üzvlərini bütün irəli sürülmüş namizədlər haqda xəbərdar edəcək. Bu ilin payızında İŞ-nin 202-ci sessiyasında bilavasitə 39-cu baş konfransdan əvvəl Şura təklifləri nəzərdən keçirəcək və gizli səsvermə əsasında daha sonra baş konfransa təqdim ediləcək namizədi seçəcək, – TASS informasiya agentliyi xəbər verir.
