Azərbaycan: həbslər davam edir
Azərbaycanda siyasi həbslər
Azərbaycanda silsilə həbslər davam edir. Bu gün müxalifətçi Tofiq Yaqublu və ictimai fəal Məhyəddin Orucov həbs edilib. Yaqublu dələduzluqda, Orucov isə xüsusilə külli miqdarda narkotik vasitələrin qanunsuz dövriyyəsində ittiham olunur. Hər ikisi ittihamları rədd edir, onlara qarşı qaldırılmış cinayət işlərinin ictimai-siyasi fəaliyyətlərinə görə hakimiyyətin qisası kimi qiymətləndirirlər.
- Azərbaycanda uşaqpulu: Nədir və nə üçün verilmir? 9 suala cavabda
- Avropa Komissiyası Gürcüstana Avropa İttifaqına üzv olmaq üçün namizəd statusu verib
- Son bir ayda Azərbaycanda səkkizinci jurnalist saxlanılıb
Müxalif siyasətçi və dələduzluq ittihamı
Dekabrın 15-də Bakının Nərimanov rayon Məhkəməsinin qərarı ilə müxalif Müsavat Partiyasının üzvü və Demokratik Qüvvələrin Milli Şurasının idarə heyətinin üzvü Tofiq Yaqublu barəsində 4 ay müddətinə həbs qətimkan tədbiri seçilib. O, Azərbaycan Cinayət Məcəlləsinin 178.3.2 (dələduzluq, külli miqdarda ziyan vurmaqla törədildikdə), 320.1 (rəsmi sənədləri saxtalaşdırma) və 320.2-ci (qəsdən saxta sənədlərdən istifadə etmə) maddələri ilə ittiham olunur.
Vəkil Nemət Kərimlinin jurnalistlərə verdiyi məlumata görə, istintaq həbs haqda vəsatəti Yaqublu azadlıqda qalarsa, “istintaqın gedişinə mane ola və gizlənə bilər” arqumenti ilə əsaslandırıb.
Müdafiə tərəfi bu iddiaların əsassız olduğuna diqqət çəkib. Vəkil Yaqublunun hazırda şərti cəza çəkdiyini və bütün bu müddət ərzində mütəmadi olaraq bu cəzanın tələblərinə əməl etdiyini məhkəmənin diqqətinə çatdırıb.
Rəsmi ittihamda deyilir ki, Yaqublu kiməsə siyasi mühacirət təşkil edəcəyini vəd edib və dekabrın 8-də bununla bağlı onunla razılığa gəlib. Artıq 11-də dələduzluq maddəsi ilə cinayət işi açılıb. Vəkil istintaqın bunu tez bir zamanda müəyyən edə biləcəyinə şübhə etdiyini bildirib.
Yaqublu da öz növbəsində ittihamı rədd edərək, cinayət işini müxalif fəaliyyəti ilə əlaqələndirib.
Yaqublu dekabrın 14-də saxlanılıb. Onun evində axtarış aparılıb. Siyasətçinin həyat yoldaşı Maya Yaqublunun sözlərinə görə, polis “evdən 5 min avro, 2500 manat və bir qədər dollar tapıb”.
“Özüm də təəccübləndim, evdə bir qəpik də yox idi. Dünən həkimə gedəndə qonşudan 50 manat borc almışam. Özləri qoyublar, özləri də tapıblar”, – deyə o bildirib.
İttiham tərəfinin iddiasına görə, Yaqublunu 7 ildən 12 ilədək müddətə azadlıqdan məhrumetmə cəzası gözləyir.
Son bir ayda jurnalistlərin, ictimai fəalların və hakimiyyəti tənqid edən siyasətçilərin həbsləri davam edir. Silsilə həbslər müstəqil “Abzas Media” internet nəşrinin rəhbərliyinin saxlanılması ilə başlayıb. Artıq “Abzas Media” işi üzrə 5 nəfər həbsdədir.
Tofiq Yaqublu kimdir?
Tofiq Yaqublu hakimiyyəti tənqid edən şəxs kimi tanınır. Əvvəllər dəfələrlə fiziki zorakılığa məruz qalıb, polis tərəfindən saxlanılıb və məhkum edilib.
Tofiq Yaqublu hakimiyyəti tənqid edən şəxs kimi tanınır. Əvvəllər dəfələrlə fiziki zorakılığa məruz qalıb, polis tərəfindən saxlanılıb və məhkum edilib.
2014-cü ilin martında Yaqublu İsmayıllı şəhərində kütləvi iğtişaşların təşkilində ittiham olunaraq 5 il müddətinə məhkum edilib. Avropa İnsan Haqları Məhkəməsi Yaqublunun həbsi zamanı onun hüquqlarının pozulduğunu tanıyıb və Azərbaycan hökuməti üzərinə 24 min avro kompensasiya ödəmək öhdəliyi qoyub. O, 2016-cı il martın 17-də erkən azad edilib.
2019-cu il oktyabrın 19-da müxalifətin Bakıda keçirdiyi mitinq zamanı Tofiq Yaqublu 30 sutka müddətinə həbs edilib. Azadlığa çıxandan sonra o, təhlükəsizlik qüvvələri tərəfindən döyüldüyünü və ondan müxalif fəaliyyətinə son qoymaq tələbi ilə hədələndiyini bildirib.
Tofiq Yaqublu 2020-ci il martın 22-də Bakıda xuliqanlıq ittihamı ilə saxlanılıb. Cinayət işinə görə, o, qəza törədib və başqa avtomobildə olan ər-arvadı döyüb. Həmin il sentyabrın 3-də o, 4 il 3 ay müddətinə azadlıqdan məhrum edilib. Sentyabrın 18-də – istintaq təcridxanasında elan etdiyi aclıq aksiyasının 18-ci günü Bakı Apellyasiya Məhkəməsinin qərarı ilə həbs qətimkan tədbiri ev dustaqlığı ilə dəyişdirilib.
O, 2022-ci il dekabrın 23-də ictimai fəal Bəxtiyar Hacıyevin azadlığa buraxılması tələbi ilə Bakının mərkəzində keçirilən etiraz aksiyasında da saxlanılıb. Məhkəmənin qərarı ilə o, 30 sutka müddətinə inzibati həbs edilib. Məhkəmə Yaqublunu “xırda xuliqanlıq” və “polisə tabe olmamaqda” təqsirli bilib.
2023-cü il yanvarın 5-də Tofiq Yaqublu aclıq aksiyasına başlayıb. Yanvarın 22-də o, 30 günlük inzibati həbsdən sonra azadlığa buraxılıb.
İctimai fəal və narkotik ticarəti ittihamı
Elə həmin gün, dekabrın 15-də ictimai fəal Məhyəddin Orucov barəsində məhkəmənin hökmü ilə 4 aylıq ilkin həbs qətimkan tədbiri seçilib. Onun barəsində Azərbaycan Cinayət Məcəlləsinin 234.4.3-cü (Qanunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, keçirmə və ya satma külli miqdarda törədildikdə) maddəsi ilə cinayət işi başlanıb.
Bu ittihamla onu 5 ildən 12 ilə qədər həbs gözləyir.
Dekabrın 13-də yaxınlarının Orucovla əlaqəsi kəsibli. Yalnız bir gün sonra onun polis tərəfindən saxlanıldığı məlum olub.
Ən son, oktyabrın 18-də fəal xırda xuliqanlıq və polisə müqavimət ittihamı ilə 30 sutka inzibati həbs edilib.
Orucov ittihamları rədd edib və bildirib ki, həbsin əsl səbəbi sosial şəbəkələrdə hakimiyyətdə olanlarla bağlı tənqidi fikirlər səsləndirməsi olub.
O, azadlığa çıxandan sonra jurnalistlərə açıqlamasında polis əməkdaşları tərəfindən fiziki və psixoloji zorakılığa məruz qaldığını bildirib. Fəal zorlama ilə hədələndiyini də deyib.
“Həbsdən çıxandan sonra başına gələnlərlə bağlı açıqlama verdi. İndi də buna görə təqib olunur”, – Müdafiə Xətti hüquq müdafiə təşkilatının həmtəsisçisi Rüfət Səfərov bildirib.
