Azərbaycanda yeni siyasi platformanın həmtəsisçisi həbs edilib
Azərbaycanda siyasi həbslər
Azərbaycanda “III Respublika Platforması”sının həmtəsisçisi Araz Əliyev saxlanılarkən fiziki zorakılığa məruz qalıb. Bu barədə onun vəkili məlumat verib. Fəal xırda xuliqanlıqda ittiham olunaraq 25 sutka inzibati həbs edilib.
- Gürcüstanda romalar. Ölkədə ən marginal qrup necə yaşayır?
- Məcburi köçkünlər Qarabağa qayıdır. İki fərqli hekayə
- Cənubi Qafqazda dəhliz oyunları. Kim nəyə ümid edir? Bakıdan baxış
Araz Əliyev dekabrın 23-də axşam saatlarında yoxa çıxıb. Ailəsinin və vəkilinin çoxsaylı müraciətlərinə baxmayaraq, hüquq-mühafizə orqanları fəalın harada olması barədə məlumat verməyib. O, bir gün sonra, dekabrın 24-də məhkəmə qarşısına çıxarılıb və İnzibati Xətalar Məcəlləsinin 510-cu (xırda xuliqanlıq) və 535.1-ci (polisə tabe olmama) maddələri ilə 25 sutka müddətinə həbs edilib.
Rəsmi ittihama görə, Araz Əliyev ictimai yerdə ünvansız şəkildə nalayiq söyüş söyüb və polis əməkdaşı ona xəbərdarlıq etdikdə o, tabe olmayıb.
Vəkil Nemət Kərimlinin sözlərinə görə, Əliyev küçədə mülki geyimli şəxslər tərəfindən yaxalanaraq zorla maşına mindirilib və bu zaman ona zərbələr endirilib. Fəal Nizami rayon polis idarəsinin 24-cü bölməsinə aparılıb. Orada onun noutbukunu götürüblər. Bundan sonra ona qarşı “ədəbsiz ifadələr işlətmək” və “polisə tabe olmamaq” ittihamları ilə protokol tərtib edilib.
Vəkil həbsdən apellyasiya şikayəti verəcəyini və Əliyevə fiziki zorakılıq göstərilməsi ilə bağlı prokurorluğa şikayət edəcəyini də bildirib.
Əliyevin həyat yoldaşı Gülarə İsmayılova da öz növbəsində ona təzyiqlərin olduğunu bildirib. O, dekabrın 24-də Daxili İşlər Nazirliyinin qarşısında dekabrın 23-ü axşam saatlarında yoxa çıxan ərinin taleyinə aydınlıq gətirilməsi tələbi ilə təkbaşına aksiya keçirərkən saxlanılıb.
O, 9-cu polis bölməsinə aparılıb. İsmayılovanın sözlərinə görə, məmurlardan biri onu gender fəalı kimi tanıyıb və aksiyalarda görərsə, həbs edəcəyi ilə hədələyib.
Araz Əliyev eyni zamanda NİDA hərəkatının üzvü, Bakı Dövlət Universitetinin fəlsəfə müəllimidir.
Araz Əliyevin itkin düşdüyü gün “III Respublika Platforması”nın digər həmtəsisçisi Akif Qurbanov da təqib olunduğunu bildirib.
“Oturduğum kafenin ətrafında neçə saatdı əməliyyatçılar dövrə vururlar. Çıxmağımı gözləyirlər.
Araz Əliyevdən xəbər olmadığını bildirdilər, onu gözləyirdim ki, məlumat alım sonra çıxım. Belə görünür gözləmək əbəsdir.
Birmənalıdır ki, bunların hamısı fəaliyyətimizə görədir. Azərbaycanı qaranlıqdan çıxarmaq cəhdlərimizə görədir. Görünür III Respublika Platformsının indiki məqamda yaranması rejimi daha da narahat edib. Çünki missiyamızda dediyimiz kimi, idarə olunan cəmiyyətdən özünü idarə edən cəmiyyətə keçmək istəyirik”, – deyə Qurbanov Facebook səhifəsində yazıb.
Dekabrın 7-də bir qrup ictimai-siyasi fəal platformanın yaradılması barədə məlumat verib. Qurumun məqsədi Azərbaycanda əsl cümhuriyyət quruluşunu qurmaqdır. “Üçüncü Respublika” Azərbaycanda avtoritarizmin rədd edilməsinə, parlamentli respublikaya və real demokratiyaya keçidə nail olmağın zəruriliyini bəyan edib.
Bu siyasi platformanın təsis sənədlərində qeyd olunur ki, 1993-cü ildə Heydər Əliyevin hakimiyyətə gəlişi ilə İkinci Respublikanın süqutu başlayıb və avtoritar rejim qurulub. Üçüncü Respublika Azərbaycanı demokratiya müstəvisinə qaytarmalıdır.
Platformanın işçi tərkibinə siyasi və ictimai fəallar Akif Qurbanov, Araz Əliyev, Elman Fəttah, Rövşən Ağayev, Ruslan İzzətli, Səməd Rəhimli və Yadigar Sadıqlı daxildir.
Akif Qurbanov bir il müddətinə işçi aparatının rəhbəri seçilib.
«III Respublika Platforması” Araz Əliyevin həbsi ilə bağlı bəyanat yayıb.
“Sərt avtoritar qaydalarla idarəetməyə aludə olan Azərbaycanın hüquq mühafizə orqanları uzun illərdir Əliyev hökumətinin tənqidçilərini adam oğurlamaq yolu ilə həbs etməyi artıq vərdişə çevirib. Araz Əliyevin də belə bir oğurlama hadisəsinin qurbanı olması şübhə doğurmur”, – deyə bəyanatda bildirilir.
Bəyanatda həmçinin deyilir ki, Araz Əliyevin yaxınlarına və müstəqil vəkilə çıxışı təmin edilmədən tutulması beynəlxalq insan haqları hüququnda qəti surətdə qadağan edilən həbsdir.
“Bu cür həbslər insanların azadlıq haqqının kobud və özbaşına pozuntusudur. Bununla yanaşı, bildiririk ki, Araz Əliyevin tutulması açıq-aşkar siyasi motivlidir və Azərbaycan hökuməti siyasi motivli həbsləri dayandırmağa dair beynəlxalq hüquqi öhdəlik daşıyır…
Son günlər vüsət alan repressiya dalğasının dayandırılmasını, üzvümüz Araz Əliyevin, eləcə də həbs edilmiş bütün jurnalistlərin və ictimai-siyasi fəalların dərhal azad edilməsini hökumətdən tələb edirik!
Biz, eyni zamanda, bütün Azərbaycan ictimaiyyətinə müraciət edərək ölkədə baş alıb gedən qanunsuzluqlara, günahsız insanların zindanlara atılmasına biganə
qalmamağa, insan haqqlarının müdafiəsində, xüsusilə də ölkənin avtoritar idarəetmədən xilas edilməsi üçün fəallığa səsləyirik!” – bəyanatda qeyd olunub.
