Azərbaycanda növbədənkənar parlament seçkiləri keçirilir
Azərbaycanda parlament seçkiləri
Bu gün Azərbaycanda Milli Məclisə növbədənkənar seçkilər keçirilir. İşğaldan azad edilmiş torpaqlar da daxil olmaqla, Azərbaycan üzrə 6478 seçki məntəqəsində səhər saat 8.00-da səsvermə başlayıb.
Mərkəzi Seçki Komissiyasının məlumatına görə, birpalatalı parlamentdə 125 yer uğrunda 990 namizəd mübarizə aparır. Onlardan 305-i 25 siyasi partiya tərəfindən irəli sürülüb, qalanları müstəqil namizədlərdir. Ölkə üzrə bütün seçki dairələrindən namizədlərini yalnız hakim Yeni Azərbaycan Partiyası irəli sürüb. Eyni məlumata görə, seçici siyahısında 7 milyona yaxın ad var.
Seçkilərdə müxalif Müsavat və Respublikaçı Alternativ (ReAl) partiyaları da iştirak edir. Ölkənin əsas müxalifət partiyalarından Azərbaycan Xalq Cəbhəsi Partiyası isə seçkiləri boykot edib. Partiya 2015-ci ildən bəri keçirilən heç bir seçkidə iştirak etməyib.
- “Uzaq boz ada” – Pirallahıdan reportaj
- “TIR” sürücüləri xaricə yük daşımaq üçün icazə ala bilmədiklərini deyirlər
- Zamirə Hacıyevanın mülklərinin satışından əldə olunan vəsaitin böyük hissəsi Azərbaycana qaytarılacaq
Müşahidəçilər
Seçkiləri ATƏT-in müşahidə missiyası və MDB ölkələrindən olan müşahidəçilər də daxil olmaqla 600-dən çox beynəlxalq, həmçinin 100 mindən çox yerli müşahidəçi izləyir.
ATƏT-in müşahidə missiyasına 20 üzv ölkədən 55 nümayəndə daxildir.
ATƏT-in qısamüddətli müşahidə missiyasının koordinatoru Maykl Krid jurnalistlərə bildirib ki, bu gün Azərbaycanda keçirilən növbədənkənar parlament seçkilərində həm təşviqat, həm də müşahidə üçün əlverişli şərait yaradılıb.
O qeyd edib ki, missiya başa çatdıqdan sonra yekun nəticələr təşkilatın internet saytında yerləşdiriləcək:
“İlk növbədə onu deyim ki, Azərbaycan hökumətinin dəvəti ilə burada olmaqdan çox məmnunuq. Onu da qeyd edim ki, seçkiqabağı dövrdə bütün siyasi partiyalara təbliğat və təşviqat aparmaq üçün ideal şərait yaradılıb. Dairələrin və seçki komissiyalarının işi qanunvericiliyə uyğun təşkil olunub. Məntəqələrdə ətraflı müşahidələr apardıqdan sonra yekun hesabat tərtib edəcəyik və rəsmi saytımızda yerləşdirəcəyik”.
AŞPA-nın müşahidəsi olmadan
Azərbaycan hakimiyyəti Avropa Şurası Parlament Assambleyasını (AŞPA) müşahidəçi qismində dəvət etməyib. Rəsmi Bakı bunun yeganə səbəbinin “Almaniya rəsmiləri də daxil olmaqla, siyasi səviyyədə vədlərə baxmayaraq, Azərbaycan nümayəndə heyətinin bu qurumdakı mandatının hələ də bərpa edilməməsi” ilə bağlı olduğunu bildirib.
Azərbaycan AŞPA-da səlahiyyətlərinin dondurulmasına səs verən 76 deputatı persona non qrata elan edib. Qurum Bakının bu qərarını tənqid edib.
İlk 2 saat ərzində seçici fəallığı 9,92 faiz
Gün ərzində 5 dəfə, saat 10.00, 12.00, 15.00, 17.00 və 19.00-da seçici fəallığı ilə bağlı rəsmi məlumat veriləcəyi bildirilib.
MSK-nın saat 10:00-a olan məlumatına görə, seçici fəallığı 9,92 faiz təşkil edib.
Mərkəzi Seçki Komissiyası (MSK) Katibliyinin İnformasiya Mərkəzinin müdiri Fərid Orucov bildirib ki, səsvermə hüququ olan 6 milyon 421 min 960 seçicidən 636 min 842 nəfər səs verib.
Qeyd edək ki, göstərici 125 hesabat verən seçki dairəsi üzrə mövcud olan statistik məlumatlara əsaslanıb. Hesabat məntəqələrinin sayı 6478-dir.
Səsvermə saat 19.00-da başa çatacaq. İlkin nəticələr sentyabrın 1-i axşam saatlarında – sentyabrın 2-nə keçən gecə məlum olacaq.
COP29-a yeni parlamentlə
İyunun 28-də prezident İlham Əliyev növbədənkənar parlament seçkilərinin təyin edilməsi haqqında sərəncam imzalayıb.
Bundan əvvəl Azərbaycan parlamenti prezidentə özünün buraxılması və Milli Məclisə növbədənkənar seçkilərin təyin edilməsi xahişi ilə müraciət edib.
Parlament hesab edib ki, COP29 zamanı Azərbaycanın ərazi bütövlüyü bərpa edildikdən sonra Milli Məclisin yeni tərkibdə təmsil olunması və parlament diplomatiyasının verdiyi imkanlardan səmərəli istifadə edilməsi üçün yeni parlamentə ehtiyac var.
2020-ci ildə Azərbaycanda keçirilən sonuncu parlament seçkiləri də növbədənkənar olub.
