Azərbaycanda itkin düşən alpinistlərin axtarışı sərt hava şəraiti üzündən təxirə salınıb

Üç gənc alpinist Tufandağ dağının ətəyində itkin düşüb, on gün sürən axtarışlar isə hələlik heç bir nəticə verməyib.

Dekabrın 23-də Azərbaycanın şimalında yerləşən Quba rayonunun Xınalıq kəndindən Tufandağa doğru üç gənc alpinist – Babur Hüseynov, Namin Bünyadov və Fəridə Cəbrayılzadə yola düşüb və geri qayıtmayıb. Bir gün sonra onlarla əlaqə kəsilib.

Növbti gün Azərbaycanın Fövqəladə Hallar Nazirliyinin yerli şöbəsinin rəhbərliyi altında axtarışlar təşkil olunub. Axtarışlara vertolyotlar və Azərbaycan Respublikası Ərazilərin Minalardan Təmizlənməsi üzrə Milli Agentliyinin (ANAMA) xüsusi avadanlıqlarla təchiz olunmuş mütəxəssisləri də cəlb edilib.

Axtarışlar hər gün səhər 6:00-dan axşam 17:00-a qədər davam etdirilib. Fövqəladə Hallar Nazirliyinin (FHN) yerli şöbəsinin rəhbəri polkovnik Şahin Mirzəyev bildirib ki,

“burada 15-20 dərəcəyə qədər şaxta müşahidə olunur, bəzi yerlərdə qarın qalınlığı 7-8 metr təşkil edir”.

Yanvarın 2-də axşam saatlarında hava daha da pisləşib, güclü qar və külək üzündən axtarışların təxirə salınması qərara alınıb.

“Axtarış dəstələri güclü qar yağışı ilə müşayiət olunan külək sakitləşənə qədər gözləmək üçün təhlükəsiz yerdə düşərgə salıbar”, – axtarış qrupunun üzvü Arzu Mustafayev məluat verib.

Sosial şəbəkələrdə və bəzi saytlarda vaxtaşırı olaraq xilasedicilərin ünvanına tənqidlər yer alır. Yanvarın 2-də xilasedicilərdən ibarət qrup bəyanat yayaraq, axtarış işlərini təşkil edənləri birbaşa səriştəsizlikdə ittiham edib.

Polkovnik Şahin Mirzəyev sosial şəbəkə istifadəçilərini yoxlanılmamış məlumatları yaymaqdan çəkindirib.

“Yalan məlumatlar işi çətinləşdirir. Bu, insanlarda çaşqınlıq yaradır və itkin düşmüş alpinistlərin yaxınlarına pis təsir edir”, – Mirzəyev APA agentliyinə deyib.

Təcrübəli alpinistlərdən biri anonimlik şərti ilə JAMnews-a bildirib ki, baş vermiş insidentdə əsas günah Ekologiya və Təbii Sərvətlər Nazirliyinin üzərinə düşür. Məhz bu qurumun rəhbərliyi alpinist marşrutlarına eksklüziv icazə vermək səlahiyyətinə sahibdir.

“Ekologiya Nazirliyi o qədər də təcrübəli olmayan üç gəncə Tufandağa qalxmaq icazəsi verib. Onlar qış vaxtı qətiyyən Tufandğa qalxmamalı idi. Orada dəhşətli çığ təhlükəsi var, relyefi elədir”, – alpinist hesab edir.

“Gilavar” hava və ekstremal idman növləri klubunun rəhbəri Ziya Qasımov bildirir ki, itkin düşən alpinistlər gənc olmalarına baxmayaraq, yetərincə təcrübəlidirlər.

“Onlar qış alpinizmi ilə tanışdırlar. Düşünmürəm ki, uşaqlar səhvə yol verib, qar uçqunu altında qala bilərlər”, – Qasımov Report agentliyinə bildirib.

FHN-in qərargahından əmin edirlər ki, havalar bir qədər düzələn kimi axtarışlar davam etdirilicək.