Rüfət Səfərov dələduzluq və xuliqanlıqda ittiham olunur
Azərbaycanda həbslər – Rüfət Səfərov
Azərbaycanda tanınmış hüquq müdafiəçisi dələduzluq və xuliqanlıq ittihamı ilə saxlanılıb. Rüfət Səfərovun özü ittihamları rədd edir və saxlanılmasının hüquq müdafiəçisi kimi fəaliyyətilə bağlı olduğunu bildirir.
- Əli Kərimli böhtan ittihamı ilə cərimələnib
- Gürcüstan prezidenti: “Etirazlar özünütəşkil səviyyəsində qalmalıdır”
- Yağış və qrunt sularının əsirinə çevrilən qəsəbə – Şağandan reportaj
“Müdafiə Xətti” hüquq müdafiə təşkilatının icraçı direktoru, hüquq müdafiəçisi Rüfət Səfərov dekabrın 3-də axşam saatlarında polis tərəfindən saxlanılıb. Bir neçə saat sonra ona qarşı Azərbaycan Cinayət Məcəlləsinin 221.1 (xuliqanlıq) və 178.3.2 (dələduzluq-külli miqdarda ziyan vurmaqla törədildikdə) maddələri ilə ittiham irəli sürüldüyü məlum olub.
Bu barədə onun vəkili Elçin Sadıqov bildirib.
Binəqədi rayon Polis İdarəsində istintaq işləri aparılır.
“O, bu gün saat 17 radələrində evə gələrkən mülki geyimli şəxslər tərəfindən saxlanılıb. Onu kimin və hansı səbəbdən saxladığı, harada olduğu bəlli deyil. Hazırda ona zəng çatmır”, – Rüfət Səfərovun atası Eldar Sabiroğlu məlumat verib.
Rüfət Səfərovun sosial media hesabında özünün xahişi ilə yazıldığı bildirilən paylaşımda onun heç bir əsas olmadan, tamamilə cəfəng və uydurma ittihamla saxlanıldığı bildirilir.
“Bəri başdan bildirirəm ki, ittiham tamamilə şər və böhtandır, hüquq müdafiəçisi kimi fəaliyyətimlə bağlıdır. Hadisə barədə detalları vəkillərim açıqlayacaq”, – deyə hüquq müdafiəçisi qeyd edib.
Səfərovun atasının sözlərinə görə, insan hüquqlarının müdafiəsinə görə ABŞ Dövlət katibi Entoni Blinken ABŞ-da ona mükafat təqdim edəcəkdi, bunun qarşısını almaq üçün oğlu həbs olunub.
“Oğlum cinayətkar deyil, peşəkar fəaliyyətinə görə saxlanılıb. Bu gün viza almışdı, Amerikaya gedəcəkdi. İnsan hüquqlarının müdafiəsi sahəsindəki fəaliyyətinə görə Blinken ona mükafat təqdim edəcəkdi. Ona görə tutublar Rüfəti”, Eldar Sabiroğlu deyib.
Daxili İşlər Nazirliyi “”Amerikanın Səsinə açıqlamasında bildirib ki, torpaq alqı-satqısı ilə əlaqədar Rüfət Səfərovla bir nəfər arasında münaqişə baş verib və bununla bağlı araşdırma aparılır.
“ABŞ Rüfət Səfərovun həbsindən narahatdır”
ABŞ çərşənbə axşamı bildirib ki, Azərbaycanda saxlanılan tanınmış hüquq müdafiəçisi Rüfət Səfərovun işini diqqətlə izləyir.
“Hüquq müdafiəçisi Rüfət Səfərovun Azərbaycanda saxlanılması ilə bağlı yayılan xəbərlərdən dərin narahatıq”, – deyə Dövlət Departamentinin mətbuat katibinin müavini Vedant Patel “Turan” informasiya agentliyinə bildirib.
Patel Azərbaycan hakimiyyətini “haqsız yerə həbs olunanların hamısını azad etməyə və vətəndaş cəmiyyətinə, o cümlədən hüquq müdafiəçiləri və jurnalistlərə qarşı repressiyalara son qoymağa” çağırıb.
“Dünyadakı insan haqları müdafiəçilərinin öz işlərini maneəsiz və qisas qorxusundan azad şəkildə həyata keçirə bilməsi çox vacibdir”, – o deyib.
Rüfət Səfərov kimdir?
Rüfət Səfərov Zərdab rayon Prokurorluğunun müstəntiqi vəsifəsində çalışıb. 2015-ci il dekabrın 21-də istefa verməsi barədə baş prokurora ərizə yazıb. O, bu addımı iqtidarda olan Yeni Azərbaycan Partiyasının fəallarından olan atası Eldar Sabiroğlunun Prezident Adminsitrasiyasının rəhbərini kəskin tənqid etməsi nəticəsində mənəvi təzyiqlərə məruz qalmasından sonra atdığını açıqlayıb.
2016-cı il yanvarın 15-də isə Rüfət Səfərov Cinayət Məcəlləsinin 311.3.2-ci (rüşvət alma, təkrar törədildikdə) maddəsi ilə Lənkəran Ağır Cinayətlər Məhkəməsinin qərarı ilə 9 il müddətinə azadlıqdan məhrum edilib. Məhkəmə zalındaca həbs olunan Səfərov ittihamı qəbul etmədiyini bildirib, hökmü “absurd və gülməli” adlandırıb.
Yerli və beynəlxalq təşkilatlar onu siyasi məhbus kimi tanıyıblar.
O, 2019-cu ilin mart ayında Azərbaycan prezidenti İlham Əliyevin imzaladığı əfv sərəncamı ilə azadlığa buraxılıb.
Rüfət Səfərov hazırda 2020-ci ildə təsis olunmuş “Müdafiə xətti” hüquq müdafiə təşkilatının həmtəsisçisidir.
“Müdafiə xətti” Azərbaycanda insan haqlarının qorunması və dəstəklənməsi, hüququn aliliyinin təmin edilməsinə yardım məqsədilə yaradılıb.
