Bazar günü həbslər - “Meydan TV işi” üzrə 7 nəfər həbs edilib
Azərbaycanda həbslər – “Meydan TV işi”
Azərbaycanda daha bir müstəqil nəşrin – “Meydan TV”nin əməkdaşları kütləvi həbs olunub. Həbs edilənlər arasında nəşrlə heç bir əməkdaşlıqlarının olmadığını deyənlər də var. Onlara qarşı daha əvvəl həbs olunan jurnalistlər kimi qaçaqmalçılıqla bağlı ittiham irəli sürülüb. Jurnalistlər isə ittihamları qəbul etmir, həbslərinin peşəkar fəaliyyətlərilə əlaqəli olduğunu bildirirlər.
Bu, redaksiyasında kütləvi həbslərin həyata keçirildiyi artıq üçüncü media orqanıdır. Bundan əvvəl “Abzas Media işi” üzrə yeddi, “Toplum TV” işi üzrə də 7 nəfər həbs edilib, iki nəfər isə polis nəzarətinə buraxılıb.
Bazar günü dekabrın 8-də iki gün öncə saxlanılan “Meydan TV” əməkdaşları və daha bir neçə media nümayəndəsi məhkəmə qarşısına çıxarılıb. Azərbaycan Cinayət Məcəlləsinin 206.3.2-ci (qaçaqmalçılıq, bir qrup şəxs tərəfindən qabaqcadan əlbir olaraq törədildikdə) maddəsilə ittiham olunan “Meydan TV” əməkdaşları Aynur Elgünəş (Qəmbərova), Natiq Cavadlı, Xəyalə Ağayeva, Aysel Umudova, Aytac Tapdıq (Əhmədova), müstəqil jurnalist Ramin Deko (Cəbrayılzadə), həmçinin Bakı Jurnalistika Məktəbinin direktor müavini Ülvi Tahirov haqqında Bakının Xətai rayon Məhkəməsinin qərarı ilə 4 ay müddətinə həbs qətimkan tədbiri seçilib.
Bu ittihamla onları 5 ildən 8 ilədək azadlıqdan məhrumetmə cəzası gözləyir.
“Meydan TV”yə qarşı hələ 2015-ci ildə cinayət işi açılmışdı. Nəşrlə əməkdaşlıq edən və etmiş jurnalistlər dəfələrlə Baş Prokurorluğun Ağır Cinayətlərə Dair İstintaq İdarəsində dəfələrlə dindirilsələr də, cinayət işinin mahiyyətinin nədən ibarə olduğu açıqlanmayıb. Bu iş üzrə dindirilən onlarla şəxsin ölkədən çıxışına qadağa qoyulub. Bu qadağa 5 ilə qədər davam edib.
Aynur Elgünəşin vəkili Elçin Qəmbərov bildirib ki, “dekabrın 6-da polislər jurnalistin evinə hücum edib, ona qarşı zorakılıq edərək kompüterini və digər şəxsi əşyalarını götürüblər”.
“Məhkəmədə Aynur qeyd etdi ki, “Meydan TV”nin araşdırmalarına və tənqidi materiallarına görə onlardan qisas alınır. O, protokolda da yazıb ki, jurnalistika ilə məşğul olub, jurnalistika cinayət deyil”.
Aysel Umudovanın vəkili Aqil Layıc bildirib ki, “məhkəmənin qərarı əsassız və qanunsuzdur”.
“Ayselin vəziyyəti yaxşı deyildi, həm Bakı şəhər Baş Polis İdarəsində saxlanılan zaman, həm Xətai rayon Polis İdarəsinin Müvəqqəti Saxlanma yerində onun üçün təcili tibbi yardım çağırıblar.
Aysel Umudovanın hansı qaçaqmalçılığından söhbət gedə bilər bizə bəlli deyil. O qeyd etdi ki, onun ölkədən çıxışına uzun bir müddət qadağa qoyulub, həmin dövrdə qaçaqmalçılıqdan söhbət gedə bilməz. Qadağa götürüləndən sonra isə o, təhsillə bağlı xaricə gedib-gələn zaman gələcəkdə belə ittihamlara məruz qalmamaq üçün hər dəfə gömrükdə bəyannamə doldurub. Çünki Aysel bilirdi ki, Azərbaycanda jurnalistika fəaliyyəti təhlükəlidir. Üstəlik hər zaman gömrükdən keçən zaman ciddi yoxlanışa məruz qalıb”, – deyə vəkil qeyd edib.
Digər həbs olunanların vəkilləri də qeyd ediblər ki, müvəkillərinin haqqında həbs-qətimkan tədbirinin seçilməsi üçün heç bir əsas, ilkin sübut olmayıb.
Jurnalistlərin hər biri həbslərinin peşəkar fəaliyyətləri ilə bağlı olduğunu vurğulayıblar.
Ülvi Tahirovun vəkili Bəhruz Bayramovun sözlərinə görə isə, müvəkkilinin “Meydan TV” ilə heç bir əlaqəsi yoxdur:
“Onlar Aynur Elgünəşlə sadəcə ailəvi dost idilər. Tahirovun evində axtarış zamanı külli miqdarda pul götürülüb. Lakin Tahirov pulun vergi ödəyicisi kimi həyat yoldaşına məxsus olduğunu bildirib. Onun xidmətlərin göstərilməsi barədə müqavilələri var və görülmüş işlər müqabilində əmək haqqı alınıb. Tahirovun özü 2022-ci ildən ümumiyyətlə xaricə getməyib”.
Dekabrın 6-da müstəqil jurnalist Ramin Deko Gürcüstandan Azərbaycana qayıdarkən aeroportda saxlanılıb. Eyni zamanda “Meydan TV” əməkdaşları Aynur Elgünəş, Xəyalə Ağayeva, Aytac Tapdıq, Aysel Umudova və Natiq Cavadlı da evlərində saxlanılıblar. Bir müddət sonra onlara qarşı “qaçaqmalçılıq” ittihamı ilə cinayət işinin açıldığı məlum olub.
Daxili İşlər Nazirliyinin yaydığı ilk məlumatda bildirilib ki, Ramin Cəbrayılzadə (Deko) valyuta qaçaqmalçılığında şübhəli bilinərək saxlanılıb. Onunla əlbir olmaqda çübhəli bilinən daha bir neçə şəxsin saxlanıldığı da qeyd edilib.
İrəliləyən saatlarda Ramin Deko və “Meydan TV”nin 5 əməkdaşından başqa əlavə şəxslərin də saxlanıldığı bəlli olub. Bu barədə dekabrın 7-də saytın “Meydan TV”nin Almaniyada yaşayan redaktoru Orxan Məmməd məlumat verib.
“Saxlanılanlar arasında müstəqil foto-jurnalist Əhməd Muxtar, media əməkdaşı Ülvi Tahirov, idman jurnalisti Rəşad Ergün, heyvan haqları fəalı Kamran Məmmədli, saxlanılanların yaxınları Elnur Cabbarzadə və Yunis Rzayev var”, – deyə Orxan Məmməd sosial şəbəkədə yazıb.
Foto-jurnalist Əhməd Muxtar dekabrın 8-də İnzibati Xətalar Məcəlləsinin 510 (xırda xuliqanlıq) və 535-ci (polisin qanuni tələbinə qəsdən tabe olmamaq) maddələrilə ittiham olunaraq 20 sutka həbs cəsası alıb.
Yunis Rzayev, heyvan haqları fəalı Kamran Məmmədli və idman jurnalisti Rəşad Ergün və Elnur Cabbarzadə saxlanılandan bir sutka sonra Bakı şəhər Baş Polis İdarəsindən sərbəst buraxılıblar.
