CPJ Azərbaycan hakimiyyətini jurnalistləri azad etməyə çağırıb
Azərbaycanda həbs olunan jurnalistlər
Nüfuzlu beynəlxalq təşkilat Jurnalistləri Müdafiə Komitəsi Azərbaycanda “Toplum TV” və digər media əməkdaşlarının həbsini tənqid edib. Təşkilat Azərbaycan hakimiyyətinə suallarla müraciət edib və həbs edilən bütün jurnalistlərin azadlığa buraxılmasına çağırıb.
- Azərbaycan polisi bu ilki “8 Marş”ı dağıtmayıb
- “Rəqəmlərlə oynayan hökumət”. Bakıdan iqtisadçı şərhi
- Təzminat məsələsi Azərbaycan və Ermənistan arasında sülh prosesinin tərkib hissəsi kimi. Bakıdan baxış
Martın 11-də Nyu-Yorkda yerləşən Jurnalistləri Müdafiə Komitəsi (CPJ) “Toplum TV” əməkdaşlarının saxlanması və həbsilə bağlı bəyanat yayıb.
“Martın 6-da saat 13:30-a yaxın paytaxt Bakıda onlarla mülki geyimli polis “Toplum TV”nin redaksiyasına daxil olub, orada olan bütün əməkdaşların avadanlıq və telefonlarını müsadirə ediblər. Ən azı 10 nəfəri şəhər polis idarəsinə aparıblar. Polisdən “Toplum TV”nin baş redaktoru Xədicə İsmayılovaya bildiriblər ki, o da dindirməyə çağırılmağa hazır olsun”, – Komitənin bəyanatında deyilir.
Video-redaktor Müşfiq Cabbar, reportyor Fərid İsmayılov və sosial şəbəkələr üzrə menecer Elmir Abbasov istisna olmaqla, digər jurnalistlər martın 6-da gecə yarısına yaxın sərbəst buraxılıblar.
Martın 8-də mülki geyimli polis “Toplum TV”nin qurucusu Ələsgər Məmmədli onkoloji xəstəlik şübhəsilə müalicə aldığı klinikadan çıxarkən onu həbs edib və fərqləndirici nişanı olmayan maşınla aparıb.
Martın 9-da Xətai Rayon Məhkəməsi eyni zamanda Media Hüquqları qrupunun (Media Rights Group) təsisçisi olan Məmmədlini dörd ay müddətinə həbs edib, polis onun mənzilində 7300 avro (7970 ABŞ dolları) nağd pul tapdığını bildirib.
Jurnalistlər pul qaçaqmalçılığı ilə bağlı ittihamları rədd edərək bildiriblər ki, onların evlərinə pulları polis özü qoyub. Bu ittiham üzrə Azərbaycan Cinayət Məcəlləsinin 206.3.2-ci maddəsilə səkkiz ilədək azadlıqdan məhrumetmə cəzası nəzərdə tutulur.
“ “Abzas Media” və “Kanal-13”ə oxşar hücumlardan sonra “Toplum TV”yə reyd və jurnalistlərin həbsi göstərir ki, Azərbaycan hakimiyyəti ölkənin müstəqil mətbuatının son qalıqlarını silmək niyyətindədir. Nəşrin təsisçisi Ələsgər Məmmədlinin onkoloji xəstəlikdən müalicə keçərkən polis tərəfindən saxlanması barədə xəbərlər xüsusilə hiddətlidir”, – Komitənin Avropa və Mərkəzi Asiya üzrə proqram koordinatoru Gülnoza Səid bildirib.
“Azərbaycan hakimiyyəti Məmmədli və Cabbarı dərhal azad etməli, “Toplum TV”nin əməkdaşlarının üzərindən bütün ittihamları götürməli və müstəqil KİV-ə qarşı repressiyalara son qoymalıdır”, – deyə o əlavə edib.
“Toplum TV” Azərbaycanda siyasi mövzuları, məmurlar arasında korrupsiya ilə bağlı araşdırmaları və fevralda prezident seçkilərində səsvermə zamanı pozuntularla bağlı ittihamları işıqlandıran əhəmiyyətli müstəqil KİV-dən biridir.
Bu, Azərbaycanın Qərblə münasibətlərinin pisləşməsi fonunda son aylarda valyuta qaçaqmalçılığında ittiham olunan üçüncü müstəqil xəbər nəşridir.
Komitənin bəyanatında həmçinin deyilir ki, korrupsiya əleyhinə araşdırmalar aparan “Abzas Media” nəşrinin altı əməkdaşı və “Kanal 13” müstəqil internet televiziyasının iki jurnalisti noyabrda saxlanılıb. “Hakimiyyət onları Qərb donorlarından aldıqları qanunsuz pulu Azərbaycana gətirməkdə günahlandırıb”.
Azərbaycan hakimiyyəti “Toplum TV”ni Qərb tərəfindən qanunsuz maliyyələşmədə açıq şəkildə ittiham etməyib, lakin hakimiyyətyönlü APA agentliyi bildirib ki, “Toplum TV” iğtişaşları qızışdırmaq üçün Qərb donorlarından qanunsuz olaraq yarım milyon dollar alıb.
Baş redaktor Xədicə İsmayılova deyib ki, polis reydindən qısa müddət sonra “Toplum TV”nin Instagram hesabı silinib və YouTube kanalının adı dəyişdirilib, bütün kontent silinib. Onun fikrincə, bu, “hakimiyyətin əsl niyyətini göstərir” ki, bu da “tənqidin ifadə olunduğu istənilən platformanı susmağa məcbur etməkdən ibarətdir”.
İsmayılova deyib ki, “Toplum TV”nin ofisi polis tərəfindən möhürlənib. Polis müsadirə edilmiş avadanlıqları və jurnalistlərin telefonlarını hələ də geri qaytarmayıb. O, “Toplum TV”nin əməkdaşlarına qarşı ittihamları “tamamilə absurd” adlandırıb. Jurnalistlərin evlərində axtarışların heç biri vəkillərin iştirakı ilə aparılmayıb, çünki polis onlara icazə verməyib.
Bəyanatın sonunda deyilir ki, “Toplum TV”nin əməkdaşlarına qarşı işin şərh edilməsi xahişilə bağlı Komitənin elektron məktubuna hələ cavab gəlməyib.
