Azərbaycanda günün xronikası: 12 aprel
Bu gün Bakıda hərbi qənimətlər parkı açılıb. Açılış mərasimində Azərbaycan prezidenti İlham Əliyev iştirak edib. İkinci Qarabağ müharibəsində Zəfər Gününün şərəfinə Bakının əsas nəqliyyat arteriyalarından birinin adı dəyişdirilərək “8 noyabr” adlandırılıb. Gün ərzində bütün vacib hadisələr haqda JAMnews-un xronikasında.
- Ermənistanda Covid-19-a qarşı vaksinasiya başlayır, preparatlar klinikalar üzrə paylaşdırılır
- “Avropaya” çörək dalınca. Ukraynada cəbhəyanı kəndin həyatı
Bakıda hərbi qənimətlər parkı açılıb. Bu, açı səma altında muzeydir. Açılış mərasimində prezident İlham Əliyev iştirak edib.
Bakının əsas nəqliyyat arteriyalarından olan “Nobel” prospektinin adı dəyişdirilərək ikinci Qarabağ müharibəsində Zəfər Gününün şərəfinə “8 Noyabr” prospekti adlandırılıb. Hərbi qənimətlər parkı bu prospektdə yerləşir.
Prezident İlham Əliyevin qızı, Heydər Əliyev Fondunun vitse-prezidenti Leyla Əliyevanın “Allahın səsini eşitmək istəyirəm” adlı yeni şeirlər toplusu dərc olunub. Ktab qırğız və rus dillərindədir.
Mədəniyyət naziri Anar Kərimov ikinci Qarabağ müharibəsi zamanı işğaldan azad edilən Füzuli rayonunda əsası 1931-ci ildə qoyulan “Araz” qəzeti redaksiyasının bərpasının planlaşdırıldığını bildirib.
Beynəlxalq reytinq agentliyi “Fitch Ratings” Azərbaycan Respublikası Dövlət Neft Şirkətinin (SOCAR) uzunmüddətli emitentin defolt reytinqini və prioritet təminatsız reytinqini “BB+” səviyyəsində təsdiqləyib. Uzunmüddətli emitentin defolt reytinqi üzrə proqnoz “mənfi”dir. Bərpa reytinqi isə “RR4” səviyyəsində müəyyən edilib.
Azərbaycanda mart ayında nikaha girmək istəyən 8 624 nəfər tibbi müayinədən keçib.
Onlardan 262 nəfər talassemiya geninin daşıyıcısı çıxıb, 84 nəfərdə sifilis, 15 nəfərdə isə QİÇS aşkarlanıb.
Bərdə rayonunun Saatlı kəndində canavar sürüsü mal-qaraya hücum edib. Nəticədə 40 baş xırda buynuzlu mal tələf olub. Yerli sakinlərin sözlərinə görə, son 10 ildə belə hal ilk dəfədir ki, baş verir.
Ötən sutka ərzində Azərbaycanda koronavirusa 1 151 yeni yoluxma halı qeydə alınıb. 7 687 test edilib. Müsbət nəticə verən testlər 14,97 faiz təşkil edib.
Koronavirusa yoluxma hallarının artması səbəbilə Milli Konservatoriya və Ağdaş rayonunun dörd orta məktəbi distant tədrisə keçib.
