Azərbaycanda qohum evlilikləri qadağan ediləcək
Azərbaycanda erkən və qohum evliliklər
Azərbaycanın Ailə Məcəlləsinə bir sıra dəyişikliklər edilməsi nəzərdə tutulub. Milli Məclisin Ailə, qadın və uşaq məsələləri komitəsinin iclasında nəzərdə tutulan dəyişikliklər müzakirə olunub. Ediləcək dəyişikliklərdən sonra 18 yaşdan aşağı xüsusi hallarda nikaha icazə verilməyəcək, qan qohumları arasında evlilik mümkün olmayacaq.
- Əksər Azərbaycan kəndlərində çaylaqlardan “küllük” kimi istifadə olunur
- “Toplum TV işi” ilə bağlı istintaq aktivləşib
- “Keşlə bazarı”nın sökülmə ehtimalı burada dolanan onlarla insanı nigaran qoyub
İyunun 11-də Azərbaycan Parlamentinin Ailə, qadın və uşaq məsələləri komitəsində Ailə Məcəlləsinə bir sıra dəyişikliklərin edilməsi müzakirə olunub. Bu dəyişikliklərə əsasən, üzrlü səbəblər olduqda nikah yaşının bir yaş azaldılmasını ehtiva edən norma ləğv ediləcək.
Hazırda qüvvədə olan məcəlləyə əsasən, üzrlü səbəblər olduqda, nikaha daxil olmaq istəyən və nikah yaşına çatmamış şəxslərin yaşadıqları ərazinin müvafiq icra hakimiyyəti orqanı onların xahişi ilə nikah yaşının 1 ildən çox olmayaraq azaldılmasına icazə verə bilər. Amma məcəllədə “üzrlü səbəb” dedikdə nə nəzərdə tutulduğu dəqiqləşdirilməyib.
Layihədə qeyd olunub ki, qanunvericilikdə üzrlü səbəblər olduqda nikah yaşının bir yaş azaldılmasını ehtiva edən normanın mövcudluğu əksər hallarda yetkinlik yaşına çatmayanların hüquq və azadlıqlarının pozulması ilə nəticələnir.
Üzrlü səbəblərin hansı meyarlara görə müəyyən edildiyi aydın olmadığından bu norma özlüyündə sui-istifadə amili kimi qiymətləndirilir.
Təklif edilən dəyişikliyə əsasən bu maddə ləğv edilir və nikah yaşı sabit olaraq 18 yaş müəyyən olunur.
Ailə Məcəlləsinə ediləcək bu dəyişikliklə əlaqədar komitə üzvləri Cinayət Məcəlləsinə də müvafiq dəyişikliklərin edilməsini də müzakirə ediblər. Belə ki, nikaha və ya erkən evliliyə daxil olmağa məcbur etməyə görə cəza müəyyən edilir.
Sözügedən dəyişikliyə əsasən, Cinayət Məcəlləsinin 176-1-ci maddəsinin (Qadını nikaha daxil olmağa məcbur etmə) adı dəyişdirilərək “Nikaha və ya erkən evliliyə daxil olmağa məcbur etmə” olacaq.
Nikah yaşına çatmayan şəxsi erkən evliliyə daxil olmağa məcbur etməyə görə üç min manatdan dörd min manatadək miqdarda cərimə və ya dörd ilədək müddətə azadlıqdan məhrumetmə ilə cəzalandırılması təklif edilir.
Bu Məcəllənin 176-1 və 176-2-ci maddələrində “erkən evlilik” dedikdə yetkinlik yaşına çatmayan şəxslə rəsmi nikah bağlamadan ailə qurmaq məqsədilə yaradılan ittifaq başa düşülür.
Yeni dəyişikliklərə görə, həmçinin Azərbaycanda nikahın bağlanmasına mane olan halların dairəsi də genişləndirilir.
Məsələ burasındadır ki, ölkədə yaxın qohumlar arasında nikah halları çox yayılıb. Qan qohumları arasında bağlanan nikahlar nəticəsində doğulan uşaqlarda genetik xəstəliklərin olması riski yüksək olsa da, yüzilliklərdir Azərbaycanda aktual olan bu cür evliliklərin qarşısını almaq mümkün deyil.
Məhz bu problemin həlli məqsədilə Ailə Məcəlləsinin 12-ci maddəsində (Nikahın bağlanmasına mane olan hallar) yaxın qohumlarla yanaşı qardaşların və (və ya) bacıların ümumi bioloji baba və (və ya) nənəsi olan uşaqlar, o cümlədən bioloji qohumluğu olan əmi (dayı) və qardaş (bacı) qızı, həmçinin bibi (xala) və qardaş (bacı) oğlu arasında nikahın bağlanmasına yol verilməyən yeni normanın təsbit edilməsi nəzərdə tutulur.
