Yaşının az olmasına baxmayaraq, Azərbaycanın vətəndaş cəmiyyətində kifayət qədər tanınan Sənay Yağmurun başına gələnlər bir neçə gündür ki, ölkədə əsas müzakirə mövzularından birinə çevrilib. Hüquq-mühafizə orqanlarının fəaliyyətsizliyi 16 yaşlı qızın zorlanması cinayətinin ictimaiyyətə açıqlanması ilə nəticələnib.
Sənay Yağmurun anası, yazıçı Zümrüd Yağmur təşkil etdiyi mətbuat konfransında 2020-ci ildə baş vermiş, lakin indiyə qədər ictimaiyyətə açıqlanmamış hadisə barədə məlumat verib. Onun sözlərinə görə, bu açıqlamaya səbəb hüquq-mühafizə orqanlarının cinayəti ört-basdır etmək istəməsi olub.
Anasının bildirdiyinə görə, 16 yaşlı Sənay Yağmur yaxın qohumu tərəfindən cinsi zorakılığa məruz qalıb. Zərərçəkmişin sosial şəbəkədə yazdığına əsasən, xalası oğlu Əsgər Ağayev onun içkisinə narkotik maddə qatıb. Daha sonra o, özündə olmayıb və həmin andan etibarən baş verənləri xatırlamır.
Hadisənin üstündən bir il keçsə də, ekspertiza rəyi və digər faktlar ortada olsa da, cinayəti törətmiş şəxs hələ də azadlıqdadır. Hazırda onun həbs edilməsi üçün internetdə imza toplanması aksiyası keçirilir.
