Azərbaycan və Ermənistan nümayəndə heyətləri Moskvada və Peterburqda “Ölməz alay” aksiyasında dalaşıb

Mayın 9-da Moskvada “Ölümsüz alay” yürüşündə Ermənistan və Azərbaycan nümayəndə heyətləri arasında münaqişə iğtişaşlara çevrilib. “Kavkazskiy uzel” xəbər verir ki, polis situasiyaya qarışmalı olub, amma saxlanılmalar haqda məlumat verilmir.

Peterburqda da analoji münaqişə yaşanıb, Azərbaycan nümayəndə heyətinin bir neçə üzvü saxlanılıb.

Rusiyanın paytaxt şəhərlərində “Ölməz alay” yürüşlərində Azərbaycan tərəfdən Rusiyanın Azərbaycan Gəncləri Təşkilatı və Azərbaycan Mədəniyyətinin Yüksəlişi və İnkişafı Fondunun nümayəndələri iştirak edib. Ermənistan tərəfindən isə Rusiya Ermənilərinin İttifaqı və erməni gənclər təşkilatlarının, o cümlədən Peterburqdakı “Nor Serund” təşkilatının üzvləri olub.

Moskvada erməni diasporunun nümayəndələri Ermənistan bayraqları ilə yanaşı Dağlıq Qarabağın bayraqlarını da qaldırıblar və “Arçax!” şüarları səsləndiriblər. Azərbaycan nümayəndə heyətinin üzvləri şifahi şəkildə bayraqların yığışdırılmasını tələb ediblər, çünki bu bayraqların “Ölümsüz alay” aksiyasının mövzusuna heç bir aidiyyəti yoxdur.

Bundan sonra “Ölümsüz alay” iştirakçıları arasında çaxnaşma düşüb, nəticədə bir neçə adam xəsarət alıb.

Azərbaycanın APA agentliyinin versiyasına görə, ermənilər “azərbaycanlılara hücum edib, nəticədə onlardan bəziləri zədələnib”. “Azərbaycanlılardan ibarət dəstə” yürüşün ermənilərin olduğu hissəsinə yaxınlaşaraq “davaya təhrik edib”, – öz növbəsində Times.am nəşri xəbər verir. Polis əməkdaşları davanın qarşısını alıb, kolonnanın erməni və azərbaycanlı hissələrini ayırıb, onların hər birini yürüşün davamında OMON (xüsusi təyinatlılar – red.) müşayiət edib.

Moskvadakı münaqişə yerindən çəkilmiş video InterAz. YouTube kanalına yerləşdirilib.

Videonun ilk saniyələrində görünür ki, Ermənistan və Dağlıq Qarabağ bayraqlarının olduğu kolonnanın yanında dayanan insanlar söz münaqişəsinə giriblər və yüksək səs tonu ilə mübahisə edirlər, bununla belə konkret sözləri seçmək çətindir. Kolonnadakı insanlar hərəkət etməyə başlayır, sonra çəkiliş rakursu dəyişir: əllərində Dağlıq Qarabağ bayrağı olan bir qrup polis tərəfindən mühasirəyə alınıb, bəziləri bir neçə butulka atır. Azərbaycan bayrağı kadra düşür, onun ağacını səhra mətbəxinə vurub sındırırlar, bu zaman dava iştirakçıları bir-birinə müxtəlif əşyalar atır, onlardan biri bayrağın ağacını tolazlayır. Hadisə yerinə çoxlu polis toplaşır.

Erməni və azərbaycanlı gənclər təşkilatlarının “Ölümsüz alay” yürüşündə iştirak etdiyi Sankt-Peterburqda da qaldırılmış Dağlıq Qarabağ bayraqlarına görə münaqişə yaşanıb.

Peterburqun “Nor Serund” erməni gənclər təşkilatının həmsədri Arşak Ohanesyan bildirir ki, Sankt-Peterburqun Azərbaycanlı Gənclər İttifaqının üzvləri Zakir Nəbizadənin başçılığı altında ermənilərə qarşı təxribat törədiblər.  

“Söz savaşı kiçik davaya çevrilib, OMON əməkdaşları da vaxtında bunun qarşısını alıb. Peterburqun Azərbaycanlı Gənclər İttifaqının bütün üzvləri saxlanılıb, onlardan ikisi qaçıb”, – “Panarmenian” Ohanesyanın sözlərindən sitat gətirib.

Azərbaycanlı Gənclər İttifaqı və Sankt-Peterburqun azərbaycanlı diasporunun digər təmsilçiləri münaqişə və saxlanılmalarla bağlı hələlik heç bir açıqlama verməyib.