Azərbaycan və Ermənistan ikinci dəfə saxlanılan insanlarla minalı sahələrin xəritəsini dəyişib
Daha 15 erməni əsir minalı sahələrin xəritəsi müqabilində təhvil verilib.
Rusiyanın vasitəçiliyi ilə Ermənistan Azərbaycan ordusunun nəzarəti altına keçmiş iki rayon ərazisində minalı sahələrin xəritəsini Azərbaycana verib. Xəritələr müqabilində Azərbaycan iyulun 3-də Bakıda mühakimə olunmuş 15 nəfər Ermənistan vətəndaşını qaytarıb.
Ermənistanda bu insanları hərbi əsir, Azərbaycanda isə diversant hesab edirlər.
- Azərbaycanda saxlanılan 15 erməni hərbçi minalanmış sahələrin xəritəsi müqabilində Ermənistana qaytarılıb
- Azərbaycanda ikinci Qarabağ müharibəsi veteranları ayrıseçkilikdən şikayətlənir
Azərbaycan XİN-in məlumatı
“İyulun 3-də Rusiya Federasiyasının təşəbbüsü ilə Ermənistan işğal dövründə Füzuli və Zəngilan rayonlarında basdırdığı təqribən 92 min tank və piyada əleyhinə minalara dair xəritələri Azərbaycan tərəfinə təqdim edib.
Mina xəritələrinin alınması üzrə humanitar təşəbbüsün həyata keçirilməsində göstərdiyi vasitəçilik xidmətlərinə görə Azərbaycan Respublikasının ərazisində müvəqqəti yerləşdirilmiş Rusiya Federasiyası sülhməramlı kontingentinin komandanı Rüstəm Muradova təşəkkür ifadə edirik.
Mina xəritələrinin əldə edilməsi on minlərlə vətəndaşımızın, o cümlədən minatəmizləyənlərin həyatını təhlükədən xilas edəcək və işğaldan azad edilmiş ərazilərimizdə Azərbaycan Respublikasının Prezidenti cənab İlham Əliyev tərəfindən əsası qoyulan tikinti və yenidənqurma layihələrini və məcburi köçkünlərin qayıdışı prosesini sürətləndirəcək.
Humanist addım olaraq Azərbaycan tərəfi məhkəmənin hökmü ilə azadlıqdan məhrum edilmiş və təyin edilmiş cəza müddəti bitmiş 15 nəfər erməni əsilli şəxsi Ermənistana təhvil verib”, – Xarici İşlər Nazirliyi mətbuat xidmətinin yaydığı məlumatda deyilir.
Saxlanılanlardan kimlərin azadlıqdan məhrumetmə müddəti bitib?
2021-ci il iyulun 2-də Bakı Ağır Cinayətlər Məhkəməsində Azərbaycan ərazisində “diversiya, terror aktları və digər cinayətlər törətməkdə” ittiham olunan Ermənistan vətəndaşları ilə bağlı növbəti məhkəmə iclası keçirilib.
Azərbaycan Respublikası Cinayət Məcəlləsinin bir neçə maddəsi üzrə ittiham olunan şəxslər aşağıdakılardır: Geqam Serobyan, Hraç Havakyan, Armen Baqasyan, Qor Qasparyan, Kamo Sefilyan, Volodya Hakobyan, Gevorq Asetryan, Sisak Yenqoyan, Albert Petrosyan, Romik Sedrakyan, Aram Minosyan, Mkrtç Minosyan, Edqar Matesyan, Yuri Karapetyan – cəmi 14 nəfər.
Prokuror AR Cinayət Məcəlləsinin 318-ci maddəsilə (sərhədi qanunsuz keçmək) Hraç Havakyan və Geqam Serobyanın 5 il, qalanların isə 2 il müddətinə azadlıqdan məhrum edilməsini istəyib.
Hraç Havakyan və Geqam Serobyannəticədə 4 il, qalan 12 nəfər isə 6 ay müddətinə azadlıqdan məhrum edilib.
Bütün məhkum edilənlər 2020-cilin dekabrında saxlanılıb və hökm oxunduğu zaman azadlıqdan məhrumetmə müddəti (altı ay) artıq bitib.
Yerevandan informasiya
Yerevanda 15 nəfərdən ibarət əsirin sülhməramlı kontingentin komandanı Rüstəm Muradovun müşayiəti ilə Azərbaycandan vətənə qaytarıldığını təsdiqləyiblər. həmçinin bildirilir ki, əsirlər məhz onun səyləri nəticəsində qaytarılıb.
Qaytarılanlardan 12 nəfəri 2020-ci il noyabrın sonunda, yəni Qarabağda hərbi əməliyyatlar bitəndən və atəşkəs haqda üçtərəfli bəyanat imzalanandan sonra Xtsaberddə (Azərbaycanın Xocavənd rayonu) ələ keçirilən hərbçilərdir. Buna görə də Ermənistan tərəfi onların “əsir alınmasını beynəlxalq humanitar hüquqların kobud pozulması” hesab edir.
İyulun 2-də 12 əsir Bakı məhkəməsi tərəfindən “Azərbaycan sərhədini pozmaq” ittihamı ilə 6 ay azadlıqdan məhrum edilib.
Onların vətənə qaytarılması üçün Ermənistan tərəfi ikinci Qarabağ müharibəsi nəticəsində Azərbaycan SQ-nin nəzarəti altına keçən Füzuli (Varanda) və Zəngilan (Kovsakan) rayonlarında minalı sahələrin xəritələrini Azərbaycana verib.
Bir qrup erməni əsirini gətirən təyyarə “Erebuni” aeroportuna enəndən sonra Rusiya sülhməramlı kontingentinin komandanı Rüstəm Muradov bildirib ki, Rusiya tərəfi “silahlı münaqişənin dayandırılması haqda üçtərəfli bəyanatın maddələrinin həyata keçirilməsini təmini üzrə işləri” davam etdirəcək.
Daha əvvəl iyunun 12-də daha 15 erməni əsirdən ibarət qrup vətənə qaytarılmışdı. O zaman bu, Ağdam rayonu ərazisindəki minalı sahələrin xəritəsinin verilməsi müqabilində baş tutmuşdu.
Ermənistan hakimiyyəti Qarabağ müharibəsindən sonra hələ də Azərbaycanda saxlanılan erməni əsirlər üzərində Bakıda keçirilən məhkəmə proseslərini qınayan bəyanatlar səsləndirməyib.
Ermənistan XİN-in 4 iyun bəyanatında deyilir ki, “beynəlxalq ictimaiyyətin çoxsaylı çağırışlarına baxmayaraq, Azərbaycan əsirlərin həqiqi sayını gizlədir, onlarla erməni əsir və mülki şəxsin saxlanılması faktını inkar edir. Üstəlik Azərbaycan əsirlikdə olduğu həm videomateriallar, həm də geri qaytarılmış əsirlərin şahidliyi ilə dəqiq sübut olunmuş şəxslərin əsir götürülməsi faktını da inkar edir”.
Ermənistan hakimiyyətinin fikrincə, Azərbaycanda saxlanılan bütün erməni hərbi əsirlər və mülki şəxslər dərhal azad edilməli və qeyd—şərtsiz vətənə qaytarılmalıdır.
