Qəzaya uğrayan AZAL təyyarəsi Rusiyanın “Pantsir-S” HHM müdafiə sistemi ilə vurulub
Azərbaycan təyyarəsi Rusiya tərəfindən vurulub
Qəzaya uğrayan Azərbaycan təyyarəsinin gövdəsi Rusiya səmasında baş verən insidentdən sonra qəlpə deşikləri ilə dolu olub, “Reuters”in məlumatında belə deyilir.
Çərşənbə axşamı Qazaxıstan hökumətinin saytında dərc olunan hesabata görə, dekabr ayında Rusiyadan Qazaxıstana uçan Azərbaycan sərnişin təyyarəsi xarici zədələrə məruz qalıb və onun gövdəsi parçalanıb. Dekabrın 25-də Rusiyanın cənubundan Xəzər dənizi üzərindən yönləndirilən “Azərbaycan Hava Yolları”na məxsus sərnişin təyyarəsinin Qazaxıstanın Aktau şəhəri yaxınlığında qəzaya uğraması nəticəsində 38 nəfər həlak olub.
Azərbaycan prezidenti İlham Əliyev dekabrda bildirib ki, Rusiyada təyyarə təsadüfən yerdən atəşə tutulub. Moskva bunu təsdiqləməyib.
Qəzadan sonra Rusiya prezidenti Vladimir Putin Rusiya hava məkanında baş verən “faciəli insident”ə görə Əliyevə üzrxahlıq edib, lakin Kreml Rusiyanın təyyarəni atəşə tutduğunu deməyib, sadəcə olaraq cinayət işinin açıldığını bildirib.
İlkin hesabat günah və ya məsuliyyət təyin etməkdənsə, gələcək qəzaların qarşısını almaq üçün dərslər öyrənmək üçün nəzərdə tutulmuş qlobal aviasiya qaydalarına uyğun olaraq yayımlanıb.
Həssaslıqla hazırlanan bu hesabatda stabilizatorları, hidravlikaları və trim sistemləri də daxil olmaqla, təyyarəyə dəyən böyük ziyana nəyin səbəb olduğu barədə məlumat verilməyib.
Lakin quyruq hissəsinin sol tərəfinin dəlmə-deşik olduğunu göstərən fotoşəkillər sənədə daxil edilib. Həmçinin sol stabilizatordan və hidravlik sistemdən çıxarılmış “kənar metal cisimlər” kimi təsvir etdiyi fraqmentlər də əks olunub.
Azərbaycanın yüksək rütbəli hökumət rəsmisi “Reuters” agentliyinə bildirib ki, hesabatda qeyd olunan xarici təsirə Rusiyanın yer-hava raketi səbəb olub.
“Azərbaycan tərəfində “Pantsir-S” raketinin bir parçası var, o, təyyarədən çıxarılıb və beynəlxalq ekspertlər tərəfindən müəyyən edilib”, – deyə mənbə bildirib.
İlk dəfədir ki, Bakı hökumətindəki mənbə Rusiyanın Braziliya istehsalı olan “Embraer” təyyarəsini vurması ilə bağlı maddi sübuta malik olduğunu iddia edib. Çərşənbə axşamı günü Rusiya rəsmilərindən məsələ ilə bağlı şərh verilməyib.
Rusiya sadəcə bildirir ki, araşdırmanı ən təcrübəli ekspertlərinə həvalə edib, hadisənin səbəb və şəraitini müəyyən etmək üçün addımlar atılır.
“SƏNİŞİNLƏR HUŞUNU İTİRİR”
Təyyarə Bakıdan Rusiyanın cənubundakı Qroznıya uçurdu və Kreml həmin vaxt Ukrayna pilotsuz təyyarələrinin bir neçə şəhərə hücum etdiyini bildirib.
Qazaxıstanda təcili eniş zamanı 29 nəfər sağ qalıb. Əliyev həlak olan pilotları Milli Qəhrəman elan edib. Azərbaycan lideri günahın Rusiya vətəndaşlarında olduğunu və Bakının ədalət tələb etdiyini bildirib.
Məlumatda qeyd olunur ki, hadisə baş verən zaman göyərtədəki səs yazıcısı 25 saniyə ərzində iki zərbə səsini qeydə alıb. İki dəqiqə sonra pilot idarəetmə qülləsinə məlumat verib ki, o, təyyarənin quşlarla toqquşduğunu zənn edir.
Beş dəqiqə sonra o, təyyarənin idarəetməni itirdiyini bildirib.
Ekipaj heyəti onları Xəzər dənizi üzərindən şərqə uçmau məcburiyyətində qoyan Qazaxıstanın Aktau şəhərinə getmək qərarına gəlməzdən əvvəl qəzaya uğrayan təyyarənin mümkün eniş yerləri kimi bir neçə başqa hava limanı da müzakirə edilib.
“Beləliklə, sərnişin salonunda oksigenin tükəndiyi bir vəziyyətdəyik, mənə elə gəlir ki, oksigen balonu partlamış ola bilər”, – deyə pilot bildirib. “Beləliklə, yanacaq iyi gəlir, bəzi sərnişinlər huşlarını itirirlər, bizə daha aşağı hündürlükdə uçmağa icazə verin”.
Təyyarə Aktauya yaxınlaşarkən qəza siqnalı verib. Pilotlar problem barədə ilk məlumat verdikdən bir saat 12 dəqiqə sonra orada yerə çırpılıb.
Məlumatı şərh edən Azərbaycanın Nəqliyyat Nazirliyi təyyarənin uçuşa tam yararlı olduğunu, lakin “xarici obyektlərin” təsirindən zədələndiyini bildirib.
Hesabatda vurğulanır ki, Rusiya hava nəqliyyatı dispetçerləri ilk zərbələrdən düz səkkiz dəqiqə sonra pilotsuz təyyarələrin hücumlarının hədəfi olan ərazilərdə təyyarələrin uçuşunu qadağan edən protokolu işə salıblar.
