Xarici ölkələrə səyahət edən Azərbaycan vətəndaşlarının sayı kəskin azalıb

2020-ci ilin ilk on ayında 1 milyon nəfərdən çox azərbaycanlı xarici ölkələrə səfər edib. Eyni dövrdə Azərbaycana isə 155 ölkədən cəmi 720 min şəxs gəlib. Azərbaycanlıların ən çox səyahət etdikləri ölkə isə İrandır.

• Azərbaycanda xüsusi karantin rejiminin müddəti uzadıldı: Əlavə qadağalar qüvvəyə minəcək

Ötən ilin yanvar-oktyabr ayları ilə müqayisədə xarici ölkələrə gedən Azərbaycan vətəndaşlarının sayı 4,2 dəfə azalıb. Dövlət Statistika Komitəsindən verilən məlumata əsasən, bu dövr ərzində xarici ölkələrə səfər edən azərbaycanlıların sayı 1 milyon 106,7 min nəfər olub.

Ölkə vətəndaşlarının 30,3 faizi İrana, 27,2 faizi Gürcüstana, 19,2 faizi Rusiya Federasiyasına, 14,6 faizi Türkiyəyə, 8,7 faizi digər ölkələrə səfər edib.

Bu şəxslərin 70,1 faizini kişilər, 29,9 faizini qadınlar təşkil edib.

2020-ci ilin yanvar-oktyabr aylarında Azərbaycana dünyanın 155 ölkəsindən 720,3 min əcnəbi və vətəndaşlığı olmayan şəxs gəlib. Əvvəlki ilin müvafiq dövrü ilə müqayisədə, ölkəyə 3,7 dəfə az əcnəbi və vətəndaşlığı olmayan şəxs gəlib.

2020-ci ilin yanvar-oktyabr aylarında ölkəmizə gələnlərin 28 faizi Rusiya Federasiyasının, 24,3 faizi Gürcüstanın, 18,9 faizi Türkiyənin, 8,6 faizi İranın, 2,1 faizi Ukraynanın payına düşüb.