Azərbaycan prezidenti münaqişələrdən ziyan çəkənlərin pensiyasını qaldırıb

Azərbaycan prezidenti İlham Əliyev hərbi xidmət zamanı əlil olmuş müxtəlif kateqoriyadan olan şəxslərin müavinətinin artırılması haqda ard-arda üç sərəncam imzalayıb.

Bu sərəncamlar Qarabağ müharibəsi veteranlarını, 20 yanvar 1990-cı ildə sovet ordusunun Bakıya daxil olması nəticəsində xəsarət alanları, İkinci Dünya Müharibəsi və Əfqanıstan müharibəsi iştirakçılarını, Çernobıl atom stansiyasında baş verən qəzasının nəticələrinin aradan qaldırılması zamanı ziyan çəkənləri, o cümlədən də həlak olanların ailələrini əhatə edəcək.

Ümumilikdə bu üç sərəncam 33,6 min insana şamil olunacaq.

Pensiyaların artırılması üçün ilin sonuna qədər dövlət büdccəsindən 6 milyon manata yaxın (3,5 milyon dollardan artıq) əlavə vəsait ayrılacaq.

Müxtəlif kateqotiyalar üzrə pensiya artımını əks etdirən cədvəl (manatla və dollarla):

• Azərbaycanın Milli Qəhrəmanları: 1300 AZN (765 USD) idi, 1500 AZN (882 USD) olacaq
• Hərbi əməliyyatlar zamanı əlil olanlar: 60 AZN (35 USD) idi, 66 AZN (39 USD) olacaq
• 20 yanvar hadisələri zamanı ziyan çəkənlər: 150 AZN (88 USD) idi, 165 AZN (97 USD) olacaq
• Qarabağ müharibəsində həlak olanların ailə üzvləri: 200 AZN (118 USD) idi, 220 AZN (129 USD) olacaq

Pensiyalar 2018-ci il martın 1-dən artacaq.