Azərbaycan Ermənistanla sərhəddə yeni yüksəklikləri nəzarətə götürüb. Bakıdan şərhlər
Köhnə Laçın dəhlizinin girişi bağlıdır
Azərbaycan Müdafiə Nazirliyi bildirir ki, ordu bir neçə dominant yüksəklikləri, əsas və köməkçi yolları, eləcə də Ermənistanla sərhəddə yerləşən əraziləri nəzarətə götürüb. Bu, köhnə Laçın dəhlizinin tamamilə bağlanması və yeni, alternativ yolun istifadəyə verilməsi ilə bağlıdır.
- “Bəzi nazirliklər Nazirlər Kabinetindən güclüdür”. Azərbaycan hökumətinin parlament qarşısında hesabatı
- Roma Statutunun ratifikasiyası: Ermənistan hakimiyyəti Rusiyaya qarşı çıxacaqmı?
- “Bakıya başqa seçim qoymurlar” – Bakıdan şərh
Azərbaycan tərəfinin məlumatına görə, köhnə Laçın dəhlizinin bağlanması ilə əlaqədar silahlı qüvvələrin yerdəyişməsi olub. Mütəxəssislər bildirirlər ki, Azərbaycan ordusu Ermənistanı Qarabağla birləşdirən yeni yolda hərəkəti idarə etmək asan olan yüksəklikdə yerləşir.
Nə baş verib?
10 noyabr 2020-ci il tarixli üçtərəfli bəyanatın şərtlərinə görə, üç il müddətində Ermənistanı Qarabağla köhnə Laçın dəhlizindən marşrutuna görə fərqli olan yeni yol birləşdirməli idi. Məsələ ondadır ki, keçmiş Laçın dəhlizi ikinci Qarabağ müharibəsi nəticəsində Azərbaycanın nəzarətinə qayıdan Laçın şəhərindən və Laçın rayonunun yaşayış məntəqələrindən keçirdi.
2022-ci il avqustun 1-də Azərbaycan yeni Laçın yolunun istifadəyə verilməsini və erməni əhalisinin Laçın şəhərindən, eləcə də Zabux və Sus kəndlərindən çıxarılmasının zəruriliyini bəyan edib. Rəsmi Bakının məlumatına görə, Ermənistan tərəfi ikitərəfli təmaslar zamanı yeni yolun istifadəyə verilmə tarixini avqustun 25-dək təxirə salmağı xahiş edib. Həmin gün yeni yol istifadəyə verilib.
Yeni Laçın yolunun hazır olmasına baxmayaraq, nəqliyyat vasitələrinin hərəkəti üçün Ermənistandan Azərbaycanla sərhədə qədər yeni yol çəkilməyib. Yerevan yeni yolun 2023-cü il aprelin 1-də hazır olacağını bildirir.
Bu gün, martın 30-da Azərbaycan köhnə Laçın dəhlizi ilə Ermənistandan gələn girişi tamamilə bağlayıb və sərhəd dirəklərinin quraşdırılmasına başlanılıb.
Ekspert rəyləri
Ehtiyyatda olan polkovnik Şair Ramaldanov “Modern.az”a bildirib ki, Azərbaycan ordusu mütəmadi olaraq dövlət maraqlarını qorumaq üçün istər Ermənistanla olan şərti sərhəddə, istərsə də Rusiya sülhməramlılarının müvəqqəti yerləşdiyi Qarabağ ərazisində mövqeylərini daim təkmilləşdirir.
“Son zamanlar sərhəddə və Qarabağda vəziyyətin gərginləşməsi, Ermənistanın sülh müqaviləsindən boyun qaçırması Azərbaycanı əlavə tədbirlər görməyə məcbur edib. Azərbaycan tərəfi Qarabağa qanunsuz silah daşınmasının qarşısının alınması üçün dəfələrlə Rusiya sülhməramlılarına siqnallar versə də, təəssüflər olsun ki, onlar bu məsələyə laqeyd yanaşıb…
Laçın rayonunda olan əlavə yollarda Azərbaycan ordusu qeyd olunan ərazilərdə əməliyyat keçirib və həmin yerlərə nəzarətimizi bərpa edib. Bu, ordumuza Laçından keçən bütün yolları nəzarətdə saxlamağa imkan verir”.
Ramaldanov qeyd edib ki, əvvəl həmin ərazidə 5-6 min terrorçu vardısa, indi onların sayının 8-10 minə çatıb. “Keçirilən əməliyyatlar separatçıların silah-sursatla təmin olunmasına qarşı atılan addımlardır”, – deyə o əlavə edib.
Hərbi analitik Alparslan İmamqulu qeyd edib ki, separatçıların tərksilah olunması və məhv edilməsi baxımından həmin ərazilərin əhəmiyyəti böyükdür.
“Laçın rayonunun Cağazur və Zabux kəndləri arasında bir sıra hakim yüksəkliklərin və yolların nəzarət altına alınması çox böyük bir hadisədir. Çünki bu cür strateji nöqtələrin azad olunması bundan sonrakı dönəmlərdə düşmənin hərəkət yollarını və qruplaşmalarını tam müşahidə altında tuta bilməyimizə şans yaradacaq”.
Hərbi ekspert Ədalət Verdiyev hesab edir ki, Azərbaycan Ordusunun Cağazur və Zabux istiqamətində hakim yüksəkliklərə, habelə digər ərazilərə nəzarət etməsi Ermənistanla sərhəddə nəzarət-buraxılış məntəqəsinin yaradılması ilə nəticələnəcək.
“Bu, Qarabağa silah daşınmasının qarşısını alacaq. Digər tərəfdən ordumuzun bu yerlərə yerləşməsi Azərbaycana Ermənistanla sərhəd olan ərazilərin çox böyük bir hissəsinə nəzarət etmək imkanı yaradacaq”.
“Sərhədlər sərt nəzarət altında olmalıdır”
Azərbaycanın keçmiş xarici işlər naziri Tofiq Zülfüqarov da Qarabağda və Ermənistanla sərhəd rayonlarda gedən dəyişikliklərlə bağlı fikirlərini bildirib.
“İstənilən dövlətin əsas vəzifələrindən biri sərhədini qorumaqdır. Sərhəd qanunları hər bir ölkədə işləyir və diqqətlə həyata keçirilir. Misal üşün, ABŞ və Meksika arasında olan sərhəd 6 metrlik dəmirdən hasardan ibarətdir”, – deyə o qeyd edib.
Zülfüqarovun sözlərinə görə, dünyanın heç bir yerində sülhməramlılar sərhəd qorumur:
“Sülhməramlıar mandata uyğun olaraq təhlükəsizliyi təmin edəcəklər. Yəni gediş-gəlişi. Azərbaycanın dövlət qurumları – sərhədçilər, gömrükçülər, sanitar xidməti və sair, onlar orada Azərbaycan qanunları çərçivəsində öz xidməti vəzifələrini yerinə yetirəcəklər.
Yəni ermənilərin uydurulmuş blokada məsələsi olmayacaq. Sadəcə, orada nəzarət olacaq və kim ki, bizim qanunları pozmayacaq, sərbəst gedib gələcək.
Bu müddət ərzində ermənilər o fikrə öyrəşiblər ki, onların istədikləri kimi, Azərbaycanın bir hissəsinin qopardılıb Ermənistana birləşdirilməsi ideyası mümkün deyil. Azərbaycan Prezidenti demişkən, ya qalırlar burada, vətəndaş olurlar, kim də razı deyisə, qapı açıqdır, çıxıb gedə bilər.
Mən istisna etmirəm k, ilkin mərhələdə postlardan çıxış mərhələsi daha sərbəst olacaq. Kim istəmirsə, çıxıb gedəcək”.
