Azərbaycan 100 min nəfərə düşən məhbusların sayına görə Avropa Şurası ölkələri arasında ilk sıralardadır
Azərbaycanda məhbuslar
Avropa Şurası (AŞ) “Həbsxana əhalisi 2022 (Prison Populations 2022)” adlı hesabatını yayıb. Sənəd Lozanna Universiteti tərəfindən hazırlanıb.
- Qarabağda “Qəzəb” əməliyyatı: dörd nəfər həlak olub, bir nəfər yaralanıb. Bakıda nə deyirlər?
- “Vaşinqtonda ən azı bir sənəd dərc edilməlidir”. Bakıdan şərhlər
- ABŞ səfirliyində Söyüdlü hadisələrinə diqqət çəkmək istəyən aktivistlər polisə təhvil veriliblər
Hesabatda deyilir ki, hazırda Avropa Şurası ölkələrinin həbsxanalarında ümumilikdə 981 min 575 məhbus cəza çəkir. Ən çox məhbusu olan Avropa Şurası ölkəsi Türkiyədir – 2022-ci ilin sonuna olan göstəricilərə görə, Türkiyə həbsxanalarında 303 min 945 məhbus olub. Böyük Britaniyanın 79 min 92, Polşanın 71 min 874, Fransanın 69 min 964 məhbusu var.
Hüquqşünas Xalid Ağaliyev bildirib ki, Türkiyədə hər 100 min əhaliyə 355 nəfər həbsdə olan və ya azadlıqdan məhrum edilmiş şəxs düşür.
“Bu kateqoriyada Türkiyəni qonşu Gürcüstan izləyir – hər 100 min nəfərə 237 məhbus düşür. Gürcüstandan sonra üçüncü yerdə Azərbaycan gəlir – hər 100 min nəfərə 216,8 məhbus düşür”, – Ağaliyev deyib.
Onun sözlərinə görə, Azərbaycanda ümumi məhbus sayı 22 334 nəfərdir. Onların 21 713 nəfəri kişi, 621 nəfəri qadındır. Azərbaycan həbsxanalarında xarici ölkələrdən olan 436 kişi, 11 nəfər qadın məhbus saxlanılır. Ümimi məhbusların 12,6 faizi 1 ildən 3 ilədək, 39,6 faizi 3 ildən 5 ilədək, 32.7 faizi 5 ildən 10 ilədək, 13.1 faizi 10 ildən 20 ilədək, 1,7 faizi ömürlük həbsdə olanlardır. Azərbaycan həbsxanalında ümumi məhbus yerlətinin sayı 25 471 olub. Onun cəmi 87,7 faizi tutulub.
Lakin cəzaçəkmə müəssisələrindəki yerlərin doluluq faizi ilə bağlı rəsmi məlumatlar məhbus yaxınlarının cəzaçəkmə müəssisələrində həddən artıq sıxlıq olduğu, xüsusən də kameralarda yerlərdən çox məhkumların saxlandığı haqda iddiaları ilə üst-üstə düşmür.
“Azərbaycan hakimiyyəti penitensiar xidmətdə çalışanların sayı ilə bağlı məlumatların məxfi olduğunu əsas gətirərək bu barədə məlumat verməyib”, – deyə hüquqşünas bildirib.
Xatırladaq ki, Azərbaycanda hər 100 min nəfər əhaliyə 2020-ci ildə 208, 2021-ci ildə 215 məhbus düşüb.
Sənəddə deyilir ki, Ermənistanda ümumilikdə 2 128 məhbus var və hər 100 min əhaliyə 71,6 məhbus düşür.
Azərbaycanda məhbusların illik xərci 2021-ci ildə 64,8 milyon avro olub. Hər məhbusun günlük xərci 7,97 avro təşkil edib. Bu göstərici Ukrayna istisna olmaqla, AŞ məkanında ən aşağı göstəricidir.
Azərbaycandan sonra hər məhbusa günlük ən az vəsaiti Türkiyə xərcləyib – 9,81 avro. Daha sonra Gürcüstan (10,55), Moldova (12,7) və Bolqarıstan (13) gəlir.
Ermənistan hər məhbusa günlük 32 avro xərcləyir.
Bu göstəricinin yüksək olmasına görə liderlik edənlər – İrlandiya 1207 avro, Norveç 378 avro, Lüksemburq 327 avro, İsveç 322 avro, Lixtenşteyn 300 avro.
Günlük xərcləmədə AŞ ortalaması 81,41 avro təşkil edir.
