Azərbaycanda prezidentin sözlərini təhrif edən informasiya saytlarının işi dayandırılıb
Ən iri hökumətyönlü informasiya agentliklərindən biri olan APA və onun törəmə resursları Lent.az Vesti.az və Kulis.az saytlarının işi dayanıb. Bu, agentliyin yaydığı xəbərdə prezident İlham Əliyevin Ermənistan-Azərbaycan münasibətləri haqda sözləri təhrif olunandan sonra baş verib.
Rəsmi mərasimdə çıxışı zamanı prezident bildirib: “Əgər Ermənistan rəhbərliyi bundan sonra da danışıqların uzadılması ilə məşğul olacaqsa, biz öz təcrid siyasətimizi davam etdirəcəyik, bütün vasitələrdən istifadə edib Ermənistanı daha da sarsıdacağıq”.
APA-nın reportajnda isə “Ermənistanı sarsıdacağıq” ifadəsi əvəzinə “Ermənistanı çökdürəcəyik” istifadə olunub. Prezident Administrasiyasından təkzib gəlib və bundan sonra bu mətn həm APA, həm də bu xəbəri təkrar dərc edən digər saytlardan silinib. Bir neçə saatdan sonra isə sayta giriş artıq mümkün olmayıb. Azərbaycanda “cərimələnmiş” saytların bloklaması təcrübəsini nəzərə alaraq, çoxları APA-nın hakimiyyət tərəfindən cəzalandırıldığını düşünüb.
APA agentliyi 2004-cü ildən fəaliyyət göstərir, bu müddət ərzində birincisi, hakimiyyətə qarşı loyal və yaxın, ikincisi isə “rəsmi” informasiyanın etibarlı mənbəyi kimi nüfuz qazanıb. APA bilavasitə dövlət strukturları ilə əməkdaşlıq edir, onların rəsmi bəyanatlarını və mövqelərini işıqlandırırdı.
KİV-də bu mövzu demək olar ki, işıqlandırılmır, amma sosial şəbəkələrdə və ictimaiyyət arasında müzakirə olunur və ehtimallar irəli sürülür. Belə bir ciddi resursun bir yanlışa görə bağlanmamalı olduğunu hesab edən bir çox jurnalist APA-dakı həmkarlarını müdafiə edir.
Məsələn, Rəşad Ergün Facebook səhifəsində yazır:
“APA saytının və onunla bağlı digər saytların birdən-birə bağlanması sadəcə dəhşətdir. Məhkəmə və istintaqsız. Belə olmamalıdır axı. Bu cür qarşılıqlı münasibət ola bilməz. Belə ölkə ola bilməz. Bu qorxuncdur. Nə peşəkar fəaliyyətd, nə də həyatda heç bir zəmanət yoxdur”.
Azərbaycanda son bir neçə ildə hakimiyyətin nəzarət edə bilmədiyi, Avropadan yayımlanan saytlar: Meydan TV, Radio Liberty bloklanıb. ANS Media Holdingi Türkiyədə dövlət çevrilişində günahlandırılan Fətullah Gülənlə müsahibənin anonsunu verəndən sonra Milli Teleradio Şurasının qərarı ilə bağlanıb. Həmçinin Rabitə Nazirliyi milli qarşıdurmanı qızışdırmaqda və terroru dəstəkləməkdə günahlandırılan bir neçə yerli saytı da bloklayıb.
