Avropa Parlamentinin iki nümayəndəsi Azərbaycan hakimiyyətini Qubad İbadoğlunu azad etməyə çağırıb
Qubad İbadoğlunun işi
Avropa Parlamentinin iki səlahiyyətli nümayəndəsi Azərbaycan hakimiyyətini həbsdə olan iqtisadçı alim, müxalif siyasətçi Qubad İbadoğlunu azad etməyə çağırıb. Amma Azərbaycan hökuməti heç bir şəkildə nüfuzlu beynəlxalq strukturların çağırışlarına cavab vermir. Bu günlərdə Apellyasiya Məhkəməsi İbadoğlunun barəsində seçilmiş həbs-qətimkan tədbirinin ev dustaqlığı ilə dəyişdirilməsi ilə bağlı vəsatəti təmin etməyib və onu həbsdə saxlayıb.
- Azərbaycanın Açıq Hökumət Tərəfdaşlığından çıxarılması nə deməkdir?
- Azərbaycanlı tələbə İranda 2 il həbs cəzası alıb
- “Azərbaycanın şəhər infrastrukturu əlillərə hesablanmayıb”
Avropa Parlamenti nümayəndələrinin bəyanatı
Avqustun 21-də Avropa Parlamentinin Cənubi Qafqaz üzrə nümayəndə heyətinin rəhbəri Marina Kalyurand və Avropa Parlamentinin Azərbaycan üzrə daimi məruzəçisi Jeliana Zovko Qubad İbadoğlunun işi ilə bağlı birgə bəyanat yayıblar.
“Biz Azərbaycanın tanınmış alimi, müxalifət lideri Qubad İbadoğlunun həbsindən və səhhətinin sürətlə pisləşməsindən ciddi narahatıq. Cənab İbadoğlu 2023-cü il iyulun 23-də saxta pul hazırlamaqda ittiham edilərək həbs edilib. Ona pəhriz qidası və zəruri dərmanlar verilmir. O, ləyaqəti alçaldan rəftara, ailəsi və vəkili ilə məhdud təmaslara məruz qalır ki, bu da onun fundamental hüquqlarının pozulması deməkdir.
Biz Azərbaycan hakimiyyətini onu təcili olaraq lazımi tibbi yardım və dərmanlarla təmin etməyə və dərhal azad etməyə çağırırıq”, – bəyanatda deyilir.
Sənəddə həmçinin deyilir ki, Qubad İbadoğlunun işi Avropa Parlamentinin 15 mart 2023-cü il tarixli qətnaməsində qeyd edildiyi kimi, son aylar Azərbaycanda insan hüquq və əsas azadlıqlarının vəziyyətinin pisləşməsindən xəbər verir.
“Belə ki, Polad Aslanov və Bəxtiyar Hacıyev kimi müxalifət siyasətçiləri, müstəqil jurnalistlər və hüquq müdafiəçiləri şübhəli ittihamlarla həbsdə saxlanılır.
Tanınmış hüquq müdafiəçisi Elçin Sadıqova qarşı davam edən cinayət işindən və onun vəkillik lisenziyasına 6 iyul 2023-cü il tarixindən xitam verilməsindən də təəssüflənirik.
Biz bütün siyasi məhbusların dərhal azad edilməsinə və bütün siyasi motivli ittihamların götürülməsinə çağırırıq.
Biz Azərbaycan hakimiyyətini fundamental azadlıqları və insan hüquqlarını qorumağa çağırırıq və qeyd edirik ki, davamlı olaraq bunu etməmək ölkənin beynəlxalq imicinə və nüfuzuna ciddi ziyan vurur”, – bəyanatda deyilir
Nə baş verib?
Azərbaycan Demokratiya və Rifah (ADR) Hərəkatının sədri Qubad İbadoğlu iyulun 23-də Baş Mütəşəkkil Cinayətkarlıqla Mübarizə İdarəsinin (“Bandotdel”) əməkdaşları tərəfindən saxlanılıb. Ona qarşı Cinayət Məcəlləsinin 204.3.1-ci (saxta pul və ya qiymətli kağızlar hazırlama, əldə etmə və ya satma mütəşəkkil dəstə tərəfindən törədildikdə) maddəsi ilə ittiham irəli sürülüb.
DİN-in yaydığı məlumata əsasən, az əvvəl FETÖ ilə əlaqədar həyata keçirilmiş xüsusi əməliyyat zamanı saxlanılan beş nəfərdən birinin İbadoğlu ilə əlaqələri müəyyən edilib və bu da onun istintaqa cəlb edilməsinə səbəb olub.
Daha sonra ona məxsus mülklərdə axtarış aparılıb. İyulun 24-də Nərimanov Rayon Məhkəməsi müxalif siyasətçi barəsində 3 ay 26 günlük həbs qətimkan tədbiri seçib.
İbadoğlu verilmiş ittihamla özünü təqsirli bilmir və həbsini siyasi fəaliyyəti ilə bağlayır.
İki həftə sonra, avqustun 8-də Türkiyə hüquq-mühafizə orqanlarının əməkdaşları İstanbulda yaşayan və işləyən daha bir iqtisadçı alim Fazil Qasımovu saxlayıb Azərbaycan hökumətinə təhvil veriblər. Rəsmi məlumata görə, o, Qubad İbadoğlunun işi üzrə həbs edilib və ona da Azərbaycan Respublikası Cinayət Məcəlləsinin 204.3.1-ci maddəsi ilə ittiham irəli sürülüb.
BMT-nin İnsan Hüquqları üzrə Ali Komissarlığı, Human Rights Watch və Human Rights House kimi nüfuzlu beynəlxalq strukturlar, bir sıra Qərb və Avropaölkələrinin Azərbaycandakı səfirlikləri Qubad İbadoğlunun azadlığa buraxılması çağırışı ilə Azərbaycan hökumətinə müraciət ediblər.
İbadoğlunun Amerikada yaşayan oğlunun evinə basqın
Qubad İbadoğlunun ABŞ-da yaşayan oğlu Emin Bayramov mənzilinə basqın olduğunu bildirib. Onun sözlərinə görə, bu, Nyu-Cersi ştatında, tələbə yoldaşları ilə birlikdə yaşadığı mənzildə baş verib. Bayramov ABŞ-ın Nyu-Cersi ştatındakı Rutgers Universitetinin 4-cü kurs tələbəsidir.
“Mən bir müddət idi ki, evdə yox idim, qayıdanda otağım tamamilə dağıdılmışdı. Evdə başqa kimin otağına girsən, tər-təmizdir, qatlanmış paltarları belə yerindədir. Təkcə mənim otağıma girəndə görürsən ki, kimsə gəlib, elə bil, dünya müharibəsi baş verib içəridə. Hər şey yerdə idi, paltarların hamısı dağıdılmışdı. Bu məsələ mən evə gəlməzdən son 24 saat içində olub. Çünki 24 saat əvvəl evdə otaq yoldaşım olub, sonra o gedib. Başqa niyyət olsaydı, evdə bahalı əşyalar var idi, götürüb apara bilərdilər. Kimsə götürüb vərəqlərimi atıb yatağımın üstünə, bir-bir baxıb içində nə var. Çantamı götürüblər, içində də mənim viza sənədlərim, atamın viza sənədlərinin, bank sənədlərinin, iş sənədlərinin surətləri”.
Emin Bayramov hesab edir ki, hadisədə Azərbaycan hakimiyyətinin əli var. Onun sözlərinə görə, atasının həbsi ilə bağlı ABŞ-ın müxtəlif strukturlarında müxtəlif görüşlər keçirib və bu, hökumətin xoşuna gəlməyə bilər:
“Çox qorxuludur ki, bu qədər yaxın gələ bilirlər. Bunlar hamısı Azərbaycan dövlətindən gözlənilən bir şeydir. Beynəlxalq hüquq müdafiəçilərilə danışdım, dedilər ki, bu klassik taktikadır, səni qorxutmağa çalışırlar. Elə bil, göz dağı verirlər ki, biz burdayıq, səni tanıyırıq. Polisə şikayət etmişəm, ərazi kamera nəzarətində idi. Ancaq mən qorxmuram. Atamı orda tutublar, yemək vermirlər, dərman vermirlər, ölümə məhkum ediblər. Az da olsa qorxum yoxdur və görüşlərimi davam etdirəcəm. Kimlər bunu edibsə, onlar başa düşməzlər ata sevgisi nədir, ölkə sevgisi nədir. Onlarda bu yoxdur”.
Apellyasiya Məhkəməsi şikayəti təmin etməyib
Avqustun 21-də Bakı Apellyasiya Məhkəməsi Qubad İbadoğlunun şikayətini təmin etməyib. Qubad İbadoğlu son iki ildə olmadığı ofisində axtarış aparılması ilə bağlı Nərimanov məhkəməsinin qərarından etiraz etmişdi.
Prosesdə Qubad İbadoğlunun özü də iştirak edib və o, axtarışın və həbsinin qanunsuz olduğunu bir daha bildirib.
Bundan əvvəl Apellyasiya Məhkəməsi müxalif siyasətçinin haqqında çıxarılmış həbs qətimkan tədbirinin evdustaqlığı ilə əvəz olunması haqda şikayətini də rədd etmişdi.
Avqustun 18-də isə Bakı Apellyasiya Məhkəməsi Qubad İbadoğlunun telefon danışıqlarına və ailə üzvləri ilə görüşlərinə qadağa qoyulması ilə bağlı kassasiya şikayətini qismən təmin edib. Nəticədə həbsdə saxlanıldığı 24 gün müddətində o, ilk dəfə ailəsinə zəng edə bilib.
