Avropa Məhkəməsi Azərbaycanda həbs olunan müxalifətçinin işinə təcili qaydada baxacaq
Qubad İbadoğlunun işi
Avropa Məhkəməsi Azərbaycanda həbs edilən müxalif siyasətçi, iqtisadçı alim Qubad İbadoğlunun işinə təcili qaydada baxacaq. Həbsdə saxlanılan müxalifətçinin səhhətinin kritik olması bu qərara səbəb olub. ABŞ Konqresinin İnsan Hüquqları Komissiyasında Qubad İbadoğlunun işi ilə bağlı dinləmələrin planlaşdırıldığı bildirilir. Bu arada onun yaxınlarının ölkədən çıxışına qadağa qoyulub.
- “Niyə Fransa bizim regionda başqa cür deyil, məhz belə davranır?” Bakıdan baxış
- “Qarabağı tərk edən Rusiya vətəndaşları və tələbələrdir”. Bakıdan şərhlər
- EFJ “Azadlıq Radiosu”nun Azərbaycan ofisindəki böhranla bağlı müstəqil araşdırma tələb edir
Avropa İnsan Hüquqları Məhkəməsi Azərbaycan Demokratiya və Rifah Partiyasının sədri Qubad İbadoğlunun işinə dərhal baxılmasına qərar verib və Azərbaycan hökumətinə suallar göndərib. AİHM Məhkəmənin Reqlamentinin 39-cu qaydasını əsas tutaraq bu qənaətə gəlib.
AİHM-nin qərarı müdafiə tərəfin Qubad İbadoğlunun səhhətinin kəskin pisləşməsi ilə əlaqədar ev dustaqlığına keçirilməsindən imtina haqqında müraciəti əsasında qəbul edilib. Bu barədə onun qardaşı Qalib Bayramov bildirib.
AİHM Azərbaycan hökumətindən İbadoğlunun səhhətinin qorunmasını təmin etmək üçün təxirəsalınmaz tədbirlər görməyi və bu barədə Strasburq Məhkəməsini məlumatlandırmağı tələb edib.
“Konqresin İnsan Hüquqları Komissiyasında dinləmələr planlaşdırılır”
Siyasətçinin azad edilməsi çağırışına daha üç amerikalı konqresmen qoşulub: Tom Kin, Herri Konolli və Bil Ketinq. Bu barədə Ketinq X sosial şəbəkəsindəki səhifəsində yazıb.
Konqresmenlər iqtisadçı-alimin hüquqlarına hörmət etməyə, onu dərman və ədalət mühakiməsilə təmin etməyə çağırıblar.
“Vəkillərin sözlərinə görə, Qubad İbadoğlu sürətlə arıqlayır və dərman qəbul etmək imkanından məhrumdur. Onun səhhəti bizi çox narahat edir. Biz Azərbaycan hakimiyyətini bütün vətəndaşların Konstitusiyada təsbit olunmuş hüquqlarına hörmət etməyə çağırırıq”, – deyə o yazıb.
Siyasətçinin qardaşı Qalib Bayramovun sözlərinə görə, İbadoğlunun hüquqlarının müdafiəsinə Konqresin azadlıqların müdafiəsi Komitəsi də qoşulub və İnsan Hüquqları Komissiyası isə İbadoğlunun işi üzrə dinləmələr təşkil etməyi planlaşdırır. Tədbirin təşəbbüskarı Kris Smitdir.
Özəl klinikada müayinəsi üçün səfirliklərə müraciət olunub
Qalib Bayramov ABŞ, Böyük Britaniya, Almaniya və Fransanın Azərbaycandakı səfirlərinə müraciət edərək Bakıdakı özəl klinikalardan birində İbadoğlunun tibbi müayinəsinin təmin olunmasına yardım göstərməyə çağırıb.
Bayramov qeyd edib ki, həbsdən əvvəl qardaşı ürək xəstəliyindən, hipertoniya, şəkərli diabetdən əziyyət çəkib.
Təcridxanada saxlandığı 45 gün ərzində hava çatışmazlığı və psixoloji təzyiq nəticəsində vəziyyəti pisləşib və qalxanabənzər vəzidə şiş əmələ gəlib. Ona ürəyin sol mədəciyinin hipertrofiyası diaqnozu qoyuldu.
Nevroz səbəbilə xroniki yorğunluq və baş ağrısı var. Ultrasəs müayinəsi böyrəklərdə və öd kisəsində mənfi dəyişiklikləri aşkar edib.
İstintaq Təcridxanasında İbadoğluna üç dəfə (25 iyul, 3 avqust, 1 sentyabr) elektrokardioqramma, ekokardioqramma, rentgen və ultrasəs müayinələri ediblər, 5 dəfə analiz üçün qan nümunələri götürülüb.
Lakin Ədliyyə Nazirliyi və Penitensiar Xidmətin Baş Tibb İdarəsinə müraciətlərə baxmayaraq, İbadoğlunun doğmalarına bu müayinələrin nəticələri verilmir. Beynəlxalq Qırmızı Xaç Komitəsinin nümayəndələrini İbadoğlunun yanına buraxmırlar və müayinələrin nəticələrini onlara da vermirlər.
“Məhkəmə vasitəsilə də müayinələrin nəticələrini əldə etmək mümkün olmayıb. Ədliyyə Nazirliyinin Baş Tibb İdarəsinin məhkəməyə verdiyi arayışda Qubad İbadoğlunun vəziyyətinin “qənaətbəxş” olduğu bildirilir ki, lakin heç bir tibbi göstərici qeyd olunmur”, – Bayramov deyib.
“Qohumlarına ölkədən çıxış qadağan edilib”
Bu arada Qubad İbadoğlunun qohumlarının ölkədən çıxışına qadağa qoyulub. Qalib Bayramovun sözlərinə görə, qadağa deputat Vüqar Bayramov xaric digər qardaşlarına və ad çəkmək istəməyən daha bir neçə qohumuna şamil olunub:
“Hətta Bayramov soyadından olmayan qohumların ölkədən çıxışına da qadağa var”.
Qalib Bayramov qeyd edib ki, sözügedən qadağanı Daxili İşlər Nazirliyi qoyub: “Bu, qanunsuzdur, çünki qadağa yalnız adı cinayət işində təqsirləndirilən şəxs kimi keçənlərə tətbiq edilə bilər”.
Nə baş verib?
Azərbaycan Demokratiya və Rifah (ADR) Hərəkatının sədri Qubad İbadoğlu iyulun 23-də Baş Mütəşəkkil Cinayətkarlıqla Mübarizə İdarəsinin (“Bandotdel”) əməkdaşları tərəfindən saxlanılıb. Ona qarşı Cinayət Məcəlləsinin 204.3.1-ci (saxta pul və ya qiymətli kağızlar hazırlama, əldə etmə və ya satma mütəşəkkil dəstə tərəfindən törədildikdə) maddəsi ilə ittiham irəli sürülüb.
DİN-in yaydığı məlumata əsasən, az əvvəl FETÖ ilə əlaqədar həyata keçirilmiş xüsusi əməliyyat zamanı saxlanılan beş nəfərdən birinin İbadoğlu ilə əlaqələri müəyyən edilib və bu da onun istintaqa cəlb edilməsinə səbəb olub.
Daha sonra ona məxsus mülklərdə axtarış aparılıb. İyulun 24-də Nərimanov Rayon Məhkəməsi müxalif siyasətçi barəsində 3 ay 26 günlük həbs qətimkan tədbiri seçib.
İbadoğlu verilmiş ittihamla özünü təqsirli bilmir və həbsini siyasi fəaliyyəti ilə bağlayır.
İki həftə sonra, avqustun 8-də Türkiyə hüquq-mühafizə orqanlarının əməkdaşları İstanbulda yaşayan və işləyən daha bir iqtisadçı alim Fazil Qasımovu saxlayıb Azərbaycan hökumətinə təhvil veriblər. Rəsmi məlumata görə, o, Qubad İbadoğlunun işi üzrə həbs edilib və ona da Azərbaycan Respublikası Cinayət Məcəlləsinin 204.3.1-ci maddəsi ilə ittiham irəli sürülüb.
BMT-nin İnsan Hüquqları üzrə Ali Komissarlığı, Human Rights Watch və Human Rights House kimi nüfuzlu beynəlxalq strukturlar, bir sıra Qərb və Avropaölkələrinin Azərbaycandakı səfirlikləri Qubad İbadoğlunun azadlığa buraxılması çağırışı ilə Azərbaycan hökumətinə müraciət ediblər.
