Avropa məhkəməsi daha üç iş üzrə Azərbaycan dövlətinə qarşı iddiaları təmin edib
Avropa İnsan Haqları Məhkəməsi Azərbaycandan qəbul etdiyi şikayətlər üzrə daha üç qərarını elan edib. Həmin qərarlar azərbaycanlı iddiaçılardan dövlətə qarşı altı şikayət üzrə çıxarılıb və ölkə hökumət ərizəçilərə üst-üstə 20 200 avro [təxminən 17 min ABŞ dolları] təzminat ödəməlidir.
- Avropa məhkəməsi Azərbaycanı daha 118 min avro cərimə etdi
- Gürcüstanda transgenderin və cinsiyyət dəyişikliyinin ilk dəfə rəsmi tanınması
- Azərbaycanda bloklanmış saytlar: Senzurasız ölkə?
Məhkəmə qərarlarının icra edilməməsinə görə
Azərbaycandan dörd ərizəçi Avropa İnsan Haqları Məhkəməsinə (AİHM) müraciət edərək, milli məhkəmə qərarlarının icra edilməməsi və ya icranın yubanmasından şikayətlənmişdilər.
Qeyd olunur ki, işə baxılan zaman cavabdeh – Azərbaycan hökuməti AİHM-ə şikayətlərdəki iddiaları qəbul edib. Cavabdeh təklif edib ki, ərizəçilərə təzminat ödənilməsi qarşılığında şikayətlər baxılacaq işlərin siyahısından xaric edilsin.
AİHM hökumətin təklifi barədə ərizəçilərə məlumat verib. İddiaçılardan yalnız E.Abbasov təklifdən imtina edib, digərləri məhkəməyə cavab verməyib.
Yekunda AİHM hökumətin təklifini qəbul edərək, ərizələrin baxılacaq işlərin çıxarılmasına qərar verib. Qərara əsasən, hökumət 3 ay ərzində E.Abbasova və Z.Əliyevaya – hərəsinə 3850 avro [$4552], A.Nağıyevə 1800 avro [$2128], Ə.Bəkirova 1200 avro [$1418] təzminat ödəməlidir.
Sözügedən işlərdə iddiaçılar mülki iddialarla məhkəmə davası açmışdılar. lakin milli məhkəmə iddialara ərizəçilərin iştirakı olmadan baxmış, məhkəmə prosesinin vaxtı və yeri barədə onları məlumatlandırmamışdı. Sonradan isə onların xeyrinə çıxarılan qərarlar icra edilməmişdi.
Ölkədən çıxışına qoyulmuş qadağaya görə
İddiaçı Elşən Əliyev Avropa məhkəməsinə müraciət edərək, Azərbaycan hökumətini onun ölkədən çıxışına yasaq qoyulması ilə bağlı ittiham edib.
Ərizəçi iddia edib ki, onun hərəkət azadlığı hüququ və şikayətlərinə baxılarkən səmərəli hüquq müdfafiə vasitələrinə malik olmaq hüququnun pozuntusuna yol verilib.
Bu işdə tərəflər dostca anlaşıblar, anlaşmaya əsasən, hökumət ərizəçiyə 5000 avro [$5912] təzminat və hüquqi xərc və məsrəflərə görə 1000 avro [$1182] ödməlidir.
Girov qarşılığında sərbəst buraxılması tələbinin rədd edilməsinə görə
Baxılan daha bir işdə ərizəçi yerli məhkəmələrin onun həbsi ilə bağlı yetərli və uyğun əsaslar təqdim etmədiyini, onun girov qarşılığında sərbəst buraxılması tələbinin rədd edildiyini iddia edib.
Ərizəçi bildirib ki, onun azadlıq və toxunulmazlıq hüququna müdaxilə baş verib.
Bu işdə ərizəçinin vəkili AİHM-i hökumətin təklif etdiyi 3500 avro [$4138] təzminatın qarşılığında iddiadan imtina etdikləri barədə məlumatlandırıb.
Məhkəmə ərizənin baxılacaq işlərin sırasından çıxarılmasına qərar verib.
![](https://jam-news.net/app/uploads/2021/06/107596297_3537359509625627_934740526399294010_n.jpg)