Azərbaycan-Ermənistan sərhədində kövrək atəşkəs rejimi pozulub – döyüşlər davam edir

16 iyula keçən gecədən etibarən Azərbaycan-Ermənistan sərhədində vəziyyət yenə gərgindir. Ötən gün iki ölkənin müdafiə nazirlikləri nisbi sakitlik olduğunu elan etsələr də, səhəri gün artıq hərbi əməliyyatların yenidən başladığı məlum olub.

Eskalasiyanın beşinci günündə sərhəddəki vəziyyətin bütün təfərrüatları Azərbaycan və Ermənistan tərəfindən.

 ● Şərh: Ermənistan və Azərbaycan sərhədində gərginliyi kim təhrik edib? Bu, Rusiya ola bilərmi?

 ● Azərbaycan-Ermənistan sərhədində qarşılıqlı atışmanın dördüncü günü vəziyyət sakitləşib

Bakıdan informasiya

Azərbaycan-Ermənistan sərhədində nisbi sakit gecədən sonra bu gün səhər hər iki tərəfdən hərbi əməliyyatlar yenidən bərpa olunub.

Azərbaycanın Müdafiə Nazirliyindən bildirilib ki, Tovuz rayonunda Azərbaycan ordusunun mövqeləri üzərində Ermənistan SQ-ə məxsus X-55 pilotsuz uçuş aparatı aşkar olunub və məhv edilib. Uçuş aparatı kəşfiyyat həyata keçirməyə çalışıb.

Bunlarla paralel ölkənin hərbi qurumu rəqibin Azərbaycan ordusuna məxsus tankın və 13 pilotsuz uçuş aparatının vurması haqda məlumatı təkzib edib.

Jurnalistlərin Ermənistan silahlı qüvvələrinin Mingəçevir su elektrik stansiyasını vurması ehtimalı ilə bağlı suallarına cavab verən Azərbaycan Müdafiə Nazirliyinin mətbuat katibi polkovnik Vaqif Dərgahlı səs-küylü bəyanat səsləndirib. O, bilavasitə bunları deyib:  

“Eyni zamanda Ermənistan tərəfi unutmamalıdır ki, Ordumuzun silahlanmasında olan ən yeni raket sistemləri Metsamor AES-ni yüksək dəqiqliklə vurmağa imkan verir ki, bu da Ermənistan üçün böyük fəlakətə səbəb ola bilər”. 

Polkovnik onu da əlavə edib ki, Mingəçevir Su Anbarının yerləşdiyi ərazinin relyefi, bu tikilidə aparılmış möhkəmləndirmə işləri, həmçinin Hava Hücumundan Müdafiə qoşunlarımızın sərəncamında olan müasir HHM vasitələri strateji obyektimizi vurmağa imkan vermir.

Döyüş zamanı Azərbaycan ordusunun  müddətdən artıq xidmət edən əsgəri Nazim İsmayılov həlak olub. O, Ermənistanla sərhəddə gedən döyüşlərdə həlak olan Azərbaycan ordusunun on ikinci hərbçisidir. Gərginləşmə müddətində bir nəfər dinc sakin də həyatını itirib. 

Yerevandan informasiya

“Gecə 03:40 radələrində Ermənistanın Silahlı Qüvvələrinin hərbi postlarında rəqibin irəlilədiyi görülüb. Ermənistan hərbi hissələri dairəvi müdafiəyə keçərək rəqibin diversiya hücumunun qarşısını almağa müvəffəq olub. İntensiv döyüşdən sonra rəqib itki verərək geri çəkilib”, – iyulun 16-da səhər Ermənistanın Müdafiə Nazirliyinin mətbuat katibinin bu xəbəri ilə açılıb.

Şuşan Stepanyan Facebook səhifəsində həmçinin yazıb ki, 05:20 radələrindən Azərbaycana məxsus hərbi hissələr D-30 haubitsaları ilə sərhədyanı Aygepar və Movses kəndlərini atəşə tutub. 

Daha sonra gecə Ermənistanın Tavuşdakı mövqeyinin Azərbaycanın 100 nəfərlik “Yəşəm” xüsusi təyinatlıları tərəfindən artilleriyanın dəstəyilə hücuma məruz qaldığı haqda məlumat yayılıb. Döyüş gedişatında Ermənistan hərbçiləri rəqibin tankını vurub.

Azərbaycan tərəfinin diversiya cəhdini Tavuş vilayətinin qubernatoru Hayk Çobanyan da təsdiqləyib. O, Facebook səhifəsində yazıb:

“Əziz tavuşlular, sizdən xahiş edirəm ki, ehtiyatlı olasız, sığınacaqlarda gizlənəsiz”.

Səhər saat 10-a doğru hazırda Tavuş vilayətində yaradılan vahid informasiya mərkəzinə rəhbərlik edən Müdafiə Nazirliyinin mətbuat katibi Artsrun Hovannisyan bildirib ki, sərhəddə gərginlik azalıb.

“Rəqib dəqiq itki verib”, – Hovannisyan Facebook səhifəsində yazıb.

Vurulmuş dronla bağlı təkzib

Ermənistanın Müdafiə Nazirliyi Azərbaycan SQ-nin X-55 dronunun vurulması ilə bağlı məlumatını təkzib edib.

“Ermənistan SQ-də bu model drondan istifadə olunmur. Bu yolla rəqib öz itkilərini kompenyasiya etmək istəyir”, – Müdafiə Nazirliyinin mətbuat katibi Şuşan Stepanyan Facebook səhifəsində yazıb.

Ombudsmen: “Dinc əhali hədəfdədir”

Ermənistan ombudsmeni Arman Tatoyan yaşayış məntəqələrinə düşən mərmi və qəlpələrin  fotolarını paylaşıb.

“Yaşayış məntəqələrinin hədəfə alınaraq atəş açıldığını bildirmək üçün bütün dəlillər var. Yerə düşən mərmilər müxtəlif xırda qəlpələrə parçalanır, onlardan hər biri insanları öldürə, şikəst edə bilər. Mən daha insanların əmlakına və evlərinə dəyən ziyandan danışmıram”, – insan haqları müdafiəçisi bildirib.

Gündüz Tavuş vilayətinin qubernatoru dinc əhali arasında ölən və yaralananların olmadığını bildirib.

Günün ikinci yarısında hərbi ekspert Artsrun Hovannisyan bildirib ki, “Azərbaycana məxsus pilotsuz uçuş aparatının zərbəsi ilə Çinari kəndinin sakini Aramais Hovakimyan yaralanıb”.

Ermənistanın baş naziri artıq sərhədyanı yaşayış məntəqələrinə Azərbaycan tərəfinin vurduğu maddi ziyanın dəyərləndirilməsi tapşırığını verib. 

Ermənistan tərəfinin bəyanatı 

Gündüz Müdafiə Nazirliyinin mətbuat katibi Şuşan Stepanyan Facebook səhifəsində bunları bildirib: 

“Atəşkəs və Azərbaycan SQ tərəfindən müvafiq əlverişli şəraitin yaradılması şərti ilə Ermənistan tərəfi həlak olanların və yaralıların döyüş meydanından çıxarılması üçün döyüş zonasında axtarış işlərinin aparılmasına içkan verməyə hazırdır”.

Günün ikinci yarısında o, yenidən sosial şəbəkədə yazıb ki, Azərbaycan ayəşkəs və hərbi əməliyyatların dayandırılması ilə bağlı razılaşmanı pozaraq yenidən dronlarla həm hərbi mövqelər, həm də yaşayış məntəqələri istiqamətində hücuma keçib:

“Xəbərdarlıq edirik: Azərbaycanın itkiləri kəskin arta bilər”.