Arçil Tatunaşvilinin ailəsi Rusiyaya qarşı Strasburq Məhkəməsində iddia qaldırmağa hazırlaşır
Fevralın 22-də Sxinvalidə naməlum şəraitdə vəfat edən Arçil Tatunaşvilinin meyitinin ekspertizasının ilkin nəticəsi məlum olub.
Levan Samxarauli adına Milli Məhkəmə Ekspertizası Bürosunun hazırladığı sənədə əsasən, Arçil Tatunaşvilinin bədənində 100-dən çox xəsarət aşkarlanıb.
Ekspertlərin rəyi istintaqın yönünün dəyişməsinə səbəb olub. İstintaq “qanunsuz azadlıqdan məhrum etmə” və “qətl” maddələri ilə aparılırdı, indi isə bu maddələrə “işgəncə tətbiq edilməsi” də əlavə olunub. Bu haqda jurnalistlərə daxili işlər nazirinin müavini Natiya Mezvrişvili məlumat verib.
“Faktiki olaraq meyitin üzərində işgəncə izləri görünür. Müvafiq olaraq, əgər istintaq hadisəni qanunsuz azadlıqdan məhrum etmə və qətl kimi tövsif etmişdisə, indi işgəncə tətbiqi də əlavə olunub. İndi istintaq bu mövqedən də işləyəcək. Biz bütün istiqamətlər üzrə işləyirik. O cümlədən də mərhumun ailəsi ilə intensiv əməkdaşlıq edirik”, – Natiya Mezvrişvili bildirib.
Ekspert rəyində “dəfələrlə slindrik kənarlı yastı əşyadan istifadə etməklə” vurulan zərbə nəticəsində 46 xəsarət haqda bildirilir və bu xəsarətlərin hamısı ona sağ ikən yetirilib. Düzdür, rəydə məhz hansı xəsarətin Tatunaşvili üçün ölümcül olduğu göstərilməyib.
Mərhumun ailəsinin ekspertiza rəyi ilə bağlı çoxlu iradı var. Ailə üzvlərinin sözlərinə görə, meyitin üzərindəki bəzi xəsarətlər sənəddə göstərilməyib. Onlar yenidən komissiya ekspertizası keçirilməsini tələb edirlər. Komissiya ekspertizası bütün xəsarətləri nəzərə almalı və ölüm səbəbini dəqiqləşdirməlidir. Bundan sonra Tatunaşvilinin ailəsi Strasburq İnsan Haqları Məhkəməsində Rusiyaya qarşı iddia qaldırmaq niyyətindədir.
“Həmçinin kardioloqların, neyro-cərrahların cəlb olunması da vacibdir və ola bilər ki, onlar ölümün işgəncə nəticəsində baş verdiyini təsbit edə bilərlər”, – mərhumun atası Qivi Tatunaşvili Azadlıq Radiosuna müsahibəsində bildirib.
Onun sözlərinə görə, ekspertiza mərhumun burun formasının niyə dəyişdiyinə, niyə zədələndiyinə, alnındakı dairəvi zədələrin nə olduğu haqda suallara cavab vermir.
“Mənə deyirlər ki, alnındakılar güllə dəlikləri deyil. O zaman qoy izah etsinlər ki, nə yarasıdır. Burnu da sanki onunku deyil”, – Qivi Tatunaşvili bildirir.
Ekspert rəyini barışıq və vətəndaş bərabərliyi üzrə dövlət naziri Ketevan Sixelaşvili də şərh edib.
“Ekspertiza rəyi təsdiqləyir ki, Tatunaşvili ilə qeyri-insani davranıblar”, – o bildirib.
Ketevan Sixelaşvili hesab edir ki, lazım olarsa, işə beynəlxalq ekspertləri də cəlb etmək mümkündür. Dövlət nazirinin sözlərinə görə, Tatunaşvilinin işi iyunun 7-də Ergenetidə baş tutacaq görüşün əsas mövzusu olacaq.
“Sabah Ergenetidə insidentlərin qarşısının alınması və onlara reaksiya mexanizmləri ilə bağlı növbəti görüş baş tutacaq. Müzakirə olunacaq əsas məsələ Tatunaşvilinin işidir. Bundan əvvəlki görüşdə Gürcüstan nümayəndə heyəti bu işin detallarına və istintaqın işi üçün vacib olan məlumatın əldə olunmasına, baş verən hadisəyə görə məsuliyyət daşıyan şəxslərin müəyyən edilməsinə bir neçə saat həsr edib. Biz bunu sabah davam etdirəcəyik və əminliklə deyə bilərəm ki, Gürcüstan tərəfi istintaqı irəlilədəcək”, – Ketevan Sixelaşvili bildirib.
Gürcüstan vətəndaşları Arçil Tatunaşvili, Levan Ktaçvili və İoseb Pavliaşvili 2018-ci il fevralın 22-də de-fakto Cənubi Osetiya hakimiyyəti tərəfindən saxlanılıblar. Növbəti gün Tatunaşvili Sxinvali təcridxanasında naməlum şəraitdə vəfat edib. Osetiya tərəfi bildirib ki, 35 yaşlı Arçil Tatunaşvili “fevralın 23-də gecə Sxinvali təcridxanasında pilləkandan yıxılıb və Sxinvali xəstəxanasında ürək çatışmazlığından ölüb”.
Bu versiya nə rəsmi Tbilisi, nə də Arçil Tatunaşvilinin ailəsi üçün inandırıcı olmayıb. Gürcüstan tərəfinin Tatunaşvilinin zorakılıq qurbanı olduğuna dair şübhələrini Osetiya tərəfinin mərhumun meyitinin təhvil verilməsini bir aya qədər ləngitməsi də təsdiqləyir.
Tatunaşvilinin meyiti Gürcüstan tərəfinə martın 20-də, ölümündən demək olar ki, bir ay sonra təhvil verilib. JAMnews meyitin Gürcüstan tərəfinə ürəyi və beyni olmadan təhvil verildiyi haqda məlumatı əldə edən və yayan ilk media orqanı olub.
Hüquqşünas Tamar Avalianinin sözlərinə görə, tibbi rəyə əsasən, Arçil Tatunaşvilinin dəqiq ölüm səbəbini aydınlaşdırmaq mümkün deyil, buna görə də labüd zaman çərçivəsində komissiya ekspertizası keçirmək lazımdır. Tamar Avaliani vurğulayıb ki, tibbi ekspertizada söhbət yalnız Tatunaşvilinin bədənində müəyyən edilən xəsarətlərdən gedir.
