Araşdırmaçı jurnalist ölkədən çıxmaq qadağasına görə vəfat edən anası ilə vidalaşa bilməyib

Azərbaycanlı araşdırmaçı jurnalist Xədicə İsmayıl ağır xəstə olan anası ilə vidalaşmaq üçün ölkədən çıxışına qoyulan qadağanın müvəqqəti ləğvi ilə bağlı müraciətinə zamanında cavab ala bilməyib. Jurnalistin anası Elmira İsmayılova martın 8-nə keçən gecə Ankarada vəfat edib.

“Bu gün məhkəmə qərarlarının icrası şöbəsinə getdim və ölkədən çıxışıma qoyulan qadağanın müvəqqəti ləğvini istədim. Anam qalxanvarı vəzinin xərçəngi diaqnozu ilə Türkiyədədir. Orada əməliyyat olunsa da, şansı çox azdır. İndi isə üstəlik ağciyərlərində də ağırlaşma var. Vəziyyəti kritikdir. Mən araşdırmalarıma görə korrupsiyalaşmış, repressiv rejimin qisası ucbatından onun yanında ola bilmirəm. Onu Azərbaycanda müalicə etmək mümkün deyildi, həkimlər hətta diaqnozu da qoya bilməmişdilər. Mən yazılı ərizə verdim, vəziyyətin təcililiyini izah etdim, tibbi rəyin surətini təqdim etdim. Məhkəmə pristavı xahişimi nəzərdən keçirəcəklərini dedi və rica etdi ki, səhəri gün zəng vurum”, – Xədicə İsmayıl Facebook-da martın 6-da yazmışdı.

Elmira İsmayılova 2018-ci ilin yanvarından Türkiyədə xəstəxanada idi.