Amerikalı məmurların kompüterlərini daha Rusiya şirkətləri müdafiə etməyəcək

ABŞ prezidenti Donald Tramp Amerikanın dövlət müəssisələrinə “Kasperski Laboratoriyası” proqram təminatından istifadə etməyi qadağan edən sərəncam imzalayıb. Üç ay müddətində məmurlar proqram təminatını dəyişməlidirlər.

Amerika xüsusi xidmət orqanları çoxdan “Kasperski Laboratoriyasının” Rusiya xüsusi xidmət orqanları ilə əlaqədə olmasından şübhələnirdi. Şirkət rəhbərliyi dəfələrlə bu ittihamları rədd edib.

“Kasperski Laboratoriyası” anti-virus kompüter proqramlarə bazarında ən iri şirkətlərdən biridir. Şirkətin mərkəzi ofisi Moskvada yerləşir.

Şirkətin əsas məhsulu – “Kasperski Anti-virusu” – kompüteri viruslardan, spamdan və xaker hücumlarından qoruyur. Amerika hökuməti uzun illər ərzində “Laboratoriyanın” xidmətlərindən istifadə edib.

ABŞ-da artıq bir ildən çoxdur ki, Rusiya hakimiyyətinin 2016-cı il prezident seçkilərinə ehtimal olunan müdaxiləsini araşdırır. 2016-cı ilin yayında, seçkiqabağı kampaniyanın qızğın vaxtında ABŞ-ın Demokrat Partiyasının serverlərinə hücum olub və Donald Trampın əsas rəqibi Hillari Klintonun işgüzar yazışması dərc olunub. Amerikanın xüsusi xidmət orqanları hesab edirlər ki, xaker hücumu Kreml tərəfindən sanksiyalaşdırılıb.

2017-ci il noyabrın əvvəlində Facebook, Google və Twitter şirkətləri bəyan ediblər ki, Rusiya hakimiyyəti Amerikada keçirilən seçkilərə sosial şəbəkələr vasitəsilə təsir etməyə cəhd göstərib.