Orqazm vətənpərvərlik hissi oyadır, yoxsa əksinə?

Bu yazını iki gün əvvəl, azərbaycanlı androloq Rauf Rzayev dünyaya qadın orqazmının yeni möcüzəli xüsusiyyətləri haqqında məlumat verəndə dərc etmək olardı. Amma bu informasiyanı həzm etmək də bir az vaxt tələb etdi.

Hələ məsələdən xəbəri olmayanların nəzərinə çatdırım ki, oxu.az saytında gedən sensasion açıqlama aşağıdakı kimi səslənirdi: “Yəni normal qadın cinsi əlaqədə olub, orqazma çatmalıdır. Orqazma çatan qadın çox mülayim xanıma çevrilir. Belə qadın kişini də, vətəni də sevəcək”.

Sosial şəbəkələrdə bu mövzuda zarafat etməyə cəhd göstərdilər, amma nəsə əlavə etmək çətiniydi. Bir az da neytral sularda və ya başqa ölkənin ərazisində yaşanan orqazmdan danışdılar və necə deyərlər, dağılışdılar.

Amma düzünə qalsa, axı bu, qeyri-sağlam tendensiyadır. Vətənin cinsi əlaqədə bu cür iştirakı ideyasının özü sizi qorxutmur? Yavaş-yavaş vətəndaşların yorğanının altına soxulan vətənpərvərlik – bunları artıq Sovet İttifaqı illərində keçmişik. Və bu heç də yaxşı nəticələrə gətirib çıxarmayıb.

Nə vaxtsa düşünmüsüz ki, vətənə sevgini oyadan nədir? Vətənpərvərlərdən xəbər alın. Onlar da cavab verəcəklər: utanmırsan? Vətənə sevgi ana südü ilə birlikdə canına hopmalıdır. Ya da valideynlərin bu sevgini səndə tərbiyə etməliydilər.

Əslində isə öz evinə, ailənə, evinin pəncərəsindən görünən küçəyə və dənizə sevgiylə doğulub böyümək olar. Bəs vətən nədir – şəhər, coğrafi sərhədlər, gerb, bayraq, milliyyət, din, dil, mədəniyyət, ənənələr? Bunlardan hansını sevirsiz, hansını yox? Nə dərəcədə səmimi sevirsiz?

Bəs onda sevgi nədir? Milli yığmamız məğlub olanda ağlamaq sevgidir? Ya da mədhiyyələr yazmaq sevgidir? Yaxud başqa ölkələrə nifrət etmək?

Necə düşünürsüz, dövləti də sevmək vacibdir? Vergilər Nazirliyini sevirsiz? Bəs Təhsil Nazirliyini? Bəs Prezident Aparatını? Dövlət sizin onu sevməyiniz üçün nəsə etməlidir, yoxsa onu sevmək sizin borcunuzdur, onun isə sizin qarşınızda heç bir borcu yoxdur?

Bəs ölkə, insanlar? Onlar kütləvi şəkildə xeyirxah, dürüst, təmizkar və qonaqpərvər olmalıdırlar ki, siz qürurla “mən xalqımı sevirəm” deyə biləsiz, yoxsa xalqı da sevməyə sadəcə borclusuz? Onu da sadəcə sizin xalqınız olduğu üçün sevməlisiz?

Məncə, problem bu sualların cavabında deyil. Problemlər o vaxt başlayır ki, insanlar birincisi, heç bir sual vermir, çünki dəqiq bilirlər, nəyi və kimi sevmək olar və olmaz; ikincisi, bu insanlar sənin kimi və necə sevməli olduğunu bilirlər. Və bunu sənin beyninə doldurmağa başlayırlar.

Bu insanlar hakimiyyətə gələndə də ən dəhşətli antiutopiyalar gerçəkləşir.

Hələliksə azərbaycanlı vətənpərvərlərə qeyri-vətənpərvərlərlə mübahisədə təzə bir arqument verilib: necə, vətəni sevmirsən? Neçə vaxtdır sekslə məşğul olmursan ki?

Dərc olunub 17.01.2017