Aİ-nin Ermənistandakı səfiri daha çox etibar qazanması üçün MSK tərkibini dəyişməyi təklif edir

фото: verelk.am

Elə eləmək lazımdır ki, Ermənistanın Mərkəzi Seçki Komissiyasına daha çox etibar edilsin, – Avropa İttifaqının Ermənistandakı nümayəndə heyətinin rəhbəri Pyotr Svitalski bəyan edib.

“MSK tərkibinə vətəndaş cəmiyyəti nümayəndələri daxil olmalıdır və s. Mənim ermənilərə məsləhətim: düşünün, MSK tərkibi məsələsini, bir də MSK-nı daha etibarlı olması və əhalinin etimadını qazanması yollarını öyrənin”, – diplomat vurğulayıb.

Aİ nümayəndəsinin bəyanatına Ermənistan hakimiyyətinin reaksiyası gecikməyib. Ədliyyə naziri David Harutunyan jurnalistlərə deyib ki, Mərkəzi Seçki Komissiyasının tərkibinin dəyişdirilməsi və ya olduğu kimi saxlanılması daxili məsələdir və həlli ölkənin Milli Məclisinin səlahiyyətindədir.

“Düşünürəm ki, bu, açıq-aşkar daxili siyasi işlərimizə müdaxilə cəhdidir, xoş və ya başqa niyyətlə edilməsindən asılı olmayaraq, mən bunu yolverilməz hesab edirəm”, – D.Harutunyan qeyd edib.

Pyotr Svitalski həmçinin Ermənistanda baş tutmuş seçkilər haqda fikrini bildirib və qeyd edib ki, seçkilər ideal olmayıb və ölkə demokratik standartlara yüksələ bilməyib. “Hələ də yoldadır. Demək olar ki, yolun artıq yarısını qət edilib”, – səfir qeyd edib və əlavə edib ki, Ermənistanın keçdiyi yolu digər ölkələrlə müqayisədə müsbət dəyərləndirir.

Səfir 2-3 ildən sonra Ermənistan növbəti seçkilərə yaxınlaşanda ölkədə ciddi dəyişikliklərin olacağına ümid etdiyini bildirib. O, müxalifət və hakimiyyət arasında əldə edilən konsensus nəticəsində ərsəyə gələn yeni Seçki Məcəlləsi haqda da fikrini bölüşüb.

“Hakimiyyət yönlü qüvvələr çalışırlar ki, Seçki Məcəlləsini öz siyasi məqsədlərinə uyğunlaşdırsınlar, hətta ən demokratik ölkələrdə də bu, təbii instinktdir. Hakim partiyasının xeyrinə xidmət edəcək elementlərdən istifadə olunur”, – səfir deyib.

Bununla bağlı ədliyyə naziri onu da qeyd edib ki, səfir öz mövqeyini açıqlamasa daha yaxşı olar: “Düşünürəm ki, bu da siyasi məsələdir və bununla bağlı səfirlər deyil, müvafiq mütəxəssislər öz nöqteyi-nəzərini ifadə edir. Və bu sahədə ən ali orqan bu məsələ ilə bağlı artıq öz rəyini vermiş Venesiya Komissiyasıdır”.