Afiəddin Məmmədov həbsdə aclıq aksiyasına başlayıb
Azərbaycanda siyasi həbslər
İki gün əvvəl həbs edilən fəal, işçi hüquqlarının müdafiəçisi Afiəddin Məmmədov həbsxanada aclıq aksiyasna başlayıb. Son 10 ayda o, artıq üçüncü dəfədir ki, inzibati həbslə cəzalandırılır. Bu dəfə o, eyni anda iki məhkəmə tərəfindən müxtəlif ittihamlarla məhkum edilib. Bir məhkəmədə cərimələnib, digərində 30 sutka inzibati həbs cəzası alıb. Məmmədov özü ona qarşı irəli sürülən ittihamların qondarma olduğunu deyir və hüquq müdafiəçisi kimi fəaliyyətinə görə təqib edildiyini bildirir.
- Gürcü dilini necə öyrəndim? Video
- İlham Əliyev: “Onlar çox pis və məqbul arasında seçim etməlidirlər”
- Rəsmilər turizmin yüksəlişindən danışır, ekspertlər isə əksini deyirlər
Son 10 ayda üçüncü həbs
Avqustun 3-də ictimai fəal, İşçi Masası Həmkarlar İttifaqları Konfederasiyasının sədri Afiəddin Məmmədov Daxili İşlər Nazirliyinin İnzibati Həbs Olunanların Saxlanma Məntəqəsində aclıq aksiyasına başlayıb. Bu barədə “Amerikanın Səsi”nə “Demokratiya 1918” Hərəkatının sədri Əhməd Məmmədli məlumat verib.
“Vəkil bildirdi ki, Afiəddin barəsində iki məhkəmə qanunsuz hökm çıxarıb. O da buna etiraz olaraq aclıq aksiyasına başlayıb. Üstəlik, onun telefonla danışmaq hüququ da əlindən alınıb”.
Avqustun 2-də Xətai Rayon Məhkəməsinin qərarı ilə ictimai fəal, İşçi Masası Həmkarlar İttifaqları Konfederasiyasının sədri Afiəddin Məmmədov İnzibati Xətalar Məcəlləsinin (İXM) 528.1-ci (Məhkəmə və digər orqanların qərarlarının icrası ilə əlaqədar icra məmurunun tələblərinin yerinə yetirilməməsi) maddəsi ilə 500 manat məbləğində cərimə olunub.
Elə həmin gün Yasamal Rayon Məhkəməsi isə onun barəsində İXM-nin 510-cu (xırda xuliqanlıq) və 535.1-ci (Polis işçisinin və ya hərbi qulluqçunun qanuni tələbinə qəsdən tabe olmama) maddələri ilə 30 sutka inzibati həbs cəzası verib.
Əhməd Məmmədli bildirib ki, Afiəddin Məmmədov artıq üçüncü dəfədir siyasi fəaliyyətinə görə həbs olunur.
“Son 10 ayda Afiəddin üçüncü dəfədir ki, şərlənərək həbs olunur. O, son 10 ayın 90 gününü həbsdə keçirməli olacaq”, – deyə Məmmədli qeyd edib.
Bir gündə iki məhkəmə, həm də vəkilsiz
Məmmədov “məhkəmə tərəfindən müəyyən edilmiş borc öhdəliklərini ödəmədiyi üçün axtarışa verilməsi ilə bağlı saxlanılıb”. bu barədə “Turan”a Daxili İşlər Nazirliyinin mətbuat xidmətinin əməkdaşı İbrahim Əmiraslanlı məlumat verib.
“Afiəddin Məmmədovla bağlı toplanmış materiallar baxılması üçün məhkəməyə göndərilib. Məhkəmənin qərarı ilə o, 30 sutka inzibati həbs edilib, – DİN nümayəndəsi bildirib.
Əhməd Məmmədlinin sözlərinə görə, fəalın vəkili Zibeydə Sadıqovaya məhkəmə iclasının vaxtı barədə məlumat verilməyib.
“Məhkəmədən vəkilə bildiriblər ki, Məmmədovun işi baxılmaq üçün hələ daxil olmayıb, Daxili İşlər Nazirliyi isə onun artıq həbs olunduğu haqda məlumat yayıb”, – Məmmədli deyib.
Ödənilməmiş borc iddiasına gəlincə, Məmmədli bildirib ki, söhbət Məmmədovun 2017-2018-ci illərdə sahibkarlıq fəaliyyəti ilə bağlı vergi borcundan gedir.
Eyni zamanda, borc öhdəliyi ilə bağlı məhkəmə qərarı 2019-cu ildə çıxarılıb və Məmmədova məlumat bu yaxınlarda verilib.
“Afiəddin icra şöbəsinə gedib və borcun bir hissəsini ödəyib. Qalan məbləğin isə məhkəmə icraçısı ilə rəsmi razılaşmaya əsasən, hər ay hissə-hissə ödənilməsinə qərar verilib. Buna baxmayaraq, o, həbs edilib, bu da onun təqibinin siyasi motivlərini təsdiqləyir”, – Məmmədli bildirib.
Onun sözlərinə görə, məhkəmənin qərarından apellyasiya şikayəti veriləcək.
Fəal kuryerlərin etiraz aksiyasından sonra saxlanılıb
Afiəddin Məmmədov avqustun 1-də qida daşıyan kuryerlər polislərin onların nəqliyyat vasitələrini cərimə meydançasına aparmasına etiraz olaraq keçirdiyi aksiyadan sonra saxlanılıb.
Polis mopedlərinin mühərriklərinin həcminin 50 kubsantimetrə qədər olduğunu əsas gətirərək, kuryerlərdən A kateqoriyalı sürücülük vəsiqəsi tələb edir. Bu, 2022-ci ilin dekabrn 16-da qanunvericviliyə yeni dəyişiklik qüvvəyə mindikdən sonra baş verib, o zaman Milli Məclis “Yol hərəkəti” haqqında Qanuna dəyişiklik edib.
İşçi Masası Həmkarlar İttifaqları Konfederasiyası və Kuryer Birliyi Həmkarlar İttifaqının yeni qüvvəyə minmiş qanunla bağlı bəyanatında deyilir ki, motosikl sürücülərinin qeydiyyat nişanı alması üçün gömrük bəyannaməsi lazımdır. Lakin motosikllərın satıldığı yerlər bununla bağlı müvafiq sənədi təqdim etmirlər, çünki motosiklet təchizatçıları onları ehtiyat hissələrinin idxalı kimi sənədləşdirir.
“Motosiklləri gətirən şirkətlərin vergidən yayınması səbəbindən kuryer fəaliyyəti ilə məşğul olanlar əziyyət çəkir”, – bəyanatda deyilir.
Afiəddin Məmmədovun məşğuliyyəti nədir?
“Demokratiya 1918” Hərəkatının İşçi Masası Həmkarlar İttifaqları Konfederasiyası 2022-ci il martın 1-də bir qrup işçi fəallar tərəfindən təsis edilib.
O, ümumi “İşçi Masası” platformasında birləşən bir sıra sahə həmkarlar ittifaqlarından ibarətdir. Bu konfederasiya özünü iqtidaryönlü, işçilərin hüquqlarını qorumayan, rəsmi Azərbaycan Həmkarlar İttifaqları Konfederasiyasına alternativ kimi təqdim edir.
İttifaqın məqsədi Azərbaycanda baş verən işçi istismarına qarşı mübarizə aparmaq, işçilərə ödənişsiz hüquqi yardım göstərmək, həmkarlar ittifaqı ənənəsini yenidən bərpa etmək, işçiləri təşkilatlandırmaq və birgə mübarizəyə təşviq etməkdir.
