Abxaziyada Ali Məhkəmənin hakiminin maşınına od vurublar

Suxumda hələlik naməlum olan şəxslər Abxaziya Ali Məhkəməsinin üzvü Temur Şoniyanın şəxsi avtomobilini yandırıblar.

Maşın martın 21-də çərşənbə axşamı, saat 22:00 radələrində yanmağa başlayıb. Temur Şoniya həmin vaxt işdə idi, maşını isə Ali Məhkəmənin binasının qarşısında dayanmışdı.

Şəhər prokuroru Ruslan Tırkbanın sözlərinə görə, yanğın söndürüləndən sonra məlum oldu ki, alovlanma sağ ön təkər tərəfdən başlayıb, sonra da alov motorxanaya yayılıb. Motor təmiz yanıb.

Temur Şoniya Abxaziyanın ən prinsipial hakimlərindən biri kimi tanınır. Son vaxtlarda baxdığı və indiyə qədər də apardığı işlər arasında bir neçə “səs-küylü” iş də var.

O cümlədən də o, Abxaziyanın keçmiş prezidenti Aleksandr Ankvaba qarşı təşkil olunan sui-qəsdlə bağlı prosesdə hakimlərdən biridir. 

Bundan əlavə, məhz Şoniya rusiyalı iş adamı Sergey Klemantoviç və rəfiqəsi Oksana Skarednayanın qətli üzrə ittiham hökmünü çıxaran və Abxaziya parlamentinin deputatı Nodik Kvitsiniyanı cinayətin təşkilatçısı kimi tanıyan Ali Məhkəmə kollegiyasının üzvü olub.

Hələ bu yanğın ərəfəsində Abxaziya prezidenti cəmiyyətə “sakitliyə riayət etmək” çağırışı ilə müraciət edib. Xadjimba 4 saylı Suxum Seçki Dairəsindən deputatlığa namizədliyini irəli sürən Batal Aybanın avtomobilinin yandırılmasını və  başqa deputatlığa namizəd, Qal seçki dairəsi üzrə ikinci tura çıxan Kaxa Pertayanın avtomobilinin atəşə tutulmasını “çirkin texnologiyalar” adlandırıb.

Məqalədə bildirilən fikirlər müəllifin nöqteyi-nəzərini əks etdirir və redaksiyanın mövqeyi ilə üst-üstə düşməyə bilər