ABŞ Rusiyaya qarşı yeni sanksiyaları işə salır

ABŞ Amerikaya məxsus və əcnəbi şirkətlərin Rusiyanın müdafiə sənayesi kompleksinə, FTX-ə, DKİ-ə aid 33 təşkilatla, həmçinin Ağ Evin “kəşfiyyat qurumu” adlandırdığı dörd təşkilatla müqavilə bağlamağı qadağan edə bilər. Bunlar The NewYorkTimes-ın dərc etdiyi məxfi hökumət sənədində əks olunub.

Amerika Administrasiyasının tərtib etdiyi və baxılmaq üçün Konqressə göndərilən siyahıya Rusiyanın 33 müəssisəsi, konserni və təşkilatı, o cümlədən də “Rosoboroneksport”, “İjmaş”, “Kalaşnikov”, “Rostex”, “MİQ”, “Suxoy”, “Tupolev” daxildir.

Kəşfiyyat təşkilatları və qurumlarından siyahıya Xarici Kəşfiyyat Xidməti (XKX), Rusiya Silahlı Qüvvələrinin Baş Qərargahının Əsas İdarəsi (keçmiş Dövlət Kəşfiyyat İdarəsi), Federal Təhlükəsizlik Xidməti (FTX) daxil edilib.

Kreditlərin verilməsinə, daşınmaz əmlakla bağlı müqavilələrə məhdudiyyət, Amerika vizalarının ləğvi və sair formalarda sanksiyalar 2018-ci il yanvarın 29-dan etibarən işə salınacaq və 2017-ci il 2 avqustdan sonrakı dövrdə siyahıda göstərilmiş Rusiya müəssisələri, idarələri və qurumları ilə “əhəmiyyətli tranzaksiya” həyata keçirən bütün Amerika və ya əcnəbi şəxslərə qarşı tətbiq ediləcək.