ABŞ Gürcüstanın kölgə hökmdarı sayılan oliqarx Bidzina İvanişviliyə qarşı maliyyə sanksiyaları tətbiq edib
ABŞ İvanişviliyə qarşı sanksiyalar tətbiq edib
ABŞ Bidzina İvanişviliyə qarşı maliyyə sanksiyaları tətbiq edib. Onun adı dekabrın 27-də Tbilisi vaxtı ilə saat 20:00-da Xarici Aktivlərə Nəzarət Ofisinin (OFAC) siyahısında yer alıb.
OFAC-ın siyahısına görə, İvanişviliyə qarşı sanksiyalar Rusiyaya yönəlmiş paketin bir hissəsidir.
“Sanksiyaya düşmüş şəxsin Birləşmiş Ştatlarda yerləşən və ya Birləşmiş Ştatlardakı şəxslərə məxsus olan, yaxud onlar tərəfindən nəzarət edilən bütün əmlakı dondurulacaq.
Bidzina İvanişvilinin rəhbərliyi altında “Gürcü arzusu” partiyası Kremlin maraqlarını təbliğ edərək, ölkənin Avro-Atlantik trayektoriyasını pozub ki, bu da Gürcüstan Konstitusiyasında nəzərdə tutulanlara və gürcü xalqının istəyinə birbaşa ziddiyyət təşkil edir”, – ABŞ Maliyyə Nazirliyinin bəyanatında deyilir.
“Birləşmiş Ştatlar “Gürcü arzusu”nun təsisçisi və fəxri sədri Bidzina Qriqoris dze (Qriqori oğlu – JAMnews) İvanişviliyə qarşı sanksiyalar tətbiq edir. Onun hərəkətləri insan haqlarının pozulmasına səbəb olub və gürcü xalqının demokratik və Avropalı gələcəyini Rusiya Federasiyasının xeyrinə sarsıdıb”, – ABŞ Dövlət Departamentinin sözçüsü Metyu Miller “X” sosial şəbəkəsində bildirib.
Qərar prezident Co Baydenin “Rusiya Federasiyasının təxribat hərəkətlərinə” cavab olaraq verdiyi 15 aprel 2021-ci il tarixli 14024 saylı Sərəncamına əsasən qəbul edilib.
Bu sərəncama əsasən, onun əhatə dairəsinə düşən bütün şəxslər və buna görə də Bidzina İvanişvili də daxil olmaqla, tammiqyaslı sanksiyalara məruz qalırlar. Bu şəxsin ABŞ yurisdiksiyasındakı aktivləri və maraqları dondurulur, ABŞ şirkətlərinə və vətəndaşlarına onunla maliyyə və ya kommersiya əlaqələri qurmaq qadağandır.
Nəticədə, bu şəxs təkcə Amerika deyil, həm də qlobal maliyyə sistemindən təcrid olunmuş vəziyyətdə düşür, çünki beynəlxalq qurumlar və şirkətlər tələblərə əməl etməyə üstünlük verirlər ki, ikinci mərhələdə artıq onlara zərbə vuracaq sanksiyalardan kənar qalsınlar.
Bu qərarla bağlı ABŞ Dövlət Departamentinin saytında aşağıdakı bəyanat dərc olunub:
“ABŞ Gürcüstanın hakim “Gürcü arzusu” partiyasının təsisçisi və fəxri sədri Bidzina Qriqoris Dze İvanişvilini Rusiya Federasiyasının maraqları naminə Gürcüstanın demokratik və Avro-Atlantik gələcəyinə zərbə vurduğuna görə siyahıya daxil edir.
İvanişvili və “Gürcü arzusu”nun hərəkətləri demokratik təsisatları sarsıdıb, insan haqlarının pozulmasına səbəb olub və Gürcüstanda fundamental azadlıqların həyata keçirilməsini məhdudlaşdırıb. Üstəlik, onlar Gürcüstanın Avro-Atlantik gələcəyini, gürcü xalqının böyük əksəriyyətinin arzuladığı və Gürcüstan Konstitusiyasının nəzərdə tutduğu gələcəyi relsdən çıxarıblar.
Nəticədə Gürcüstan ərazisinin 20 faizindən çoxunu işğal altında saxlamaqda davam edən Rusiya qarşısında həssas vəziyyətə düşüb.
Biz İvanişvilinin rəhbərliyi altında “Gürcü arzusu”nun hərəkətlərini, o cümlədən Gürcüstan vətəndaşlarına, etirazçılara, media nümayəndələrinə, hüquq müdafiəçilərinə və müxalifətçilərə qarşı davam edən amansız repressiyaları kəskin şəkildə pisləyirik.
Birləşmiş Ştatlar Gürcüstanda demokratiya və insan haqlarını pozanları məsuliyyətə cəlb etməyə sadiqdir.
İvanişvili 14024 saylı İcra Sərəncamının 1(a)(ii)(C) Bölməsinə uyğun olaraq ABŞ-da və ya xaricdə demokratik proseslərə və ya institutlara xələl gətirən hərəkətlərə və ya siyasətlərə, yaxud birbaşa və ya dolayı yolla cavabdehlik daşıdığına, Rusiya Federasiyası hökumətinin adından və ya maraqları naminə birbaşa və ya dolayısı ilə çıxış etdiyinə və ya çıxış etməyə cəhd göstərdiyinə görə sanksiya siyahısına daxil edilir”.
Gürcüstan tarixində ilk dəfə olaraq onlarla insan ABŞ və Aİ-yə üzv ölkələrin sanksiyaları altındadır.
Onların arasında yüksək vəzifəli məmurlar, hakimlər, fərdi şəxslər, iş adamları, parlament üzvləri və “Gürcü arzusu”nun digər təmsilçiləri də var.
Sanksiyalar müxtəlifdir:
110-dan çox şəxsin ABŞ vizası alması məhdudlaşdırılıb. Təkcə sanksiya siyahısında olanlar deyil, onların ailə üzvləri də ABŞ-a gedə bilməyəcək.
Beləliklə, məhdudiyyətlər yüzlərlə insana şamil edilir.
Diplomatik pasportlara malik yüzlərlə insan (dəqiq siyahı yoxdur) artıq Aİ ölkələri daxilində vizasız səyahət edə bilməyəcək.
Maqnitski siyahısında altı nəfər var. Bu, ciddi maliyyə sanksiyalarını, o cümlədən siyahıda olan şəxslərin bütün əmlakının, səhmlərinin və maliyyələrinin “dondurulmasını” nəzərdə tutur. Siyahıda 4 nəfər yüksək vəzifə tutur.
Baltikyanı ölkələrdən 40-dan çox, Ukraynadan isə 19-dan çox şəxs fərdi sanksiyalara məruz qalıb.
Bir çox məmurlar eyni vaxtda bir neçə sanksiya paketi altındadır. Məsələn, daxili işlər naziri və baş nazirin müavini Vaxtanq Qomelauri. O, bir neçə ölkənin sanksiya siyahısına, eləcə də Maqnitski siyahısına salınıb.
Qərb tərəfdaşları Gürcüstan rəsmilərinə demokratiyaya mane olmaq, insan haqlarını pozmaq, dezinformasiya yaymaq, korrupsiya, nümayişçilərə və jurnalistlərə qarşı amansız repressiyaya görə sanksiyalar tətbiq ediblər.
