ABŞ-ın dövlət katibi: “Gürcüstanın NATO-ya girəcəyi saatını səbirsizliklə gözləyirik”
Mayın 21-də Gürcüstanın baş naziri Giorgi Kvirikaşvili dövlət katibi Mayk Pompeo ilə görüşüb.
“Bir neçə gündən sonra Gürcüstan ilk Respublikanın 100 illiyini qeyd edəcək. Gürcüstan ABŞ-ın layiqli tərəfdaşı və müttəfiqi olmazdan əvvəl uzun yol keçib”, – deyə Gürcüstanın baş naziri Giorgi Kvirikaşvili Vaşinqton görüşünün sonunda bildirib.
Onun sözlərinə görə, Trampın prezidentliyi dövründə ikitərəfli münasibətlər daha da möhkənlənib. “Biz gələcəkdə daha böyük potensial görürük”, deyə Kvirikaşvili qeyd edib.
Baş nazirin sözlərinə görə, ABŞ-ın daimi dəstəyi nəticəsində Gürcüstanda demokratik proseslər dönməz xarakter alıb, dövlət institutları möhkəmlənib, Gürcüstanın və regionun iqtisadi inkişafı üçün ciddi imkanlar yaranıb.
Dövlət katibi Mayk Pompeo Gürcüstanın baş naziri ilə görüşdən sonra bildirib ki, ABŞ Gürcüstanın NATO üzvü olacağı saatı səbirsizliklə gözləyir.
“Bizim qərarımız dəyişməzdir. Prezident Tramp 2008-ci il Buxarest sammitinin qərarını birmənalı şəkildə dəstəkləyir və ABŞ Gürcüstanın NATO üzvlüyünə qəbul olacağı günü səbirsizliklə gözləyir. Biz bugünkü görüşümüzdə milli təhlükəsizlik, dinamik iqtisadiyyatı və demokratiyan bir-birinə bağlayan bütün aspektləri nəzərdən keçirdik”, – Pompeo bəyan edib.
Gürcüstanın baş naziri və ABŞ dövlət katibi diqqətlərini bir sıra mövzuların üzərində cəmləşdiriblər:
Rusiya ilə münaqişə və ərazi bütövlüyü
Giorgi Kvirikaşvili qeyd edib ki, Rusiya ilə münaqişədə ABŞ-ın münasibəti və Ağ Evin Gürcüstanın ərazi bütövlüyünə sözssüz dəstəyi olduqca vacibdir.
“Rusiya ilə münaqişədə, eyni zamanda Abxaziya və Sxinvali regionunun – Gürcüstan ərazilərinin işğaldan azad edilməsində ABŞ-ın dəstəyi Gürcüstan və bütün region üçün olduqca vacibdir”, – deyə Kvrikaşvili bəyan edib.
Mayk Pompeonun sözlərinə görə, ABŞ düz 10 il əvvəl Rusiyanın Gürcüstan torpaqlarını işğal etməsini pisləyib. “Rusiya tərəfindən işğal edilmiş Abxaziya və Cənubi Osetiya Gürcüstanın ayrılmaz hissəsidir. ABŞ beynəlxalq aləmin qəbul etdiyi sərhədlər çərçivəsində Gürcüstanın suverinliyi və ərazi bütövlüyünü tanıyır. Biz Rusiyanı 2008-ci il razılaşması çərçivəsində öz öhdəliyini yerinə yetirməyə, qoşunlarını 2008-ci il avqust münaqişəsindən əvvəlki mövqelərə çəkməyə, Abxaziya və Cənubi Osetiyanın suverenlyini tanımaqdan imtinaya, bu iki regiona humanitar yardımların göstərilməsinə şərait yaratmağa çağırırıq” , – ABŞ dövlət katibi bildirib.
Hərbi sahə
Giorgi Kvirikaşvili ABŞ-ın hərbi sahədə və Gürcüstanın müdafiə qabiliyyətinin gücləndirilməsində köməyinin vacibliyini qeyd edib. Onun sözlərinə görə, NATO standartlarına çatmaq üçün bütün zəruri işləri görür. O, tank əleyhinə JAVELİN sistemini əldə etmək üçün şərait yaratdığına görə ABŞ-a təşəkkür edib.
“Biz ümid edirik ki, bu il yaxınlaşmaqda olan Brüssel sammitində bizim NATO üzvlüyünə can atmağımız və bu işdə əldə etdiyimiz inkişaf layiqli təqdirini alacaq. Gürcüstanın NATO-ya daxil olması Avro-Atlantik təhlükəsizlik imkanlarını genişləndirəcək və cənab dövlət katibi, Gürcüstanın NATO-ya qəbulu məsələsində göstərdiyiniz dəstəyə görə sizə minnətdarlığımı bildirmək istəyirəm”, – baş nazir bildirib və vurğulayıb ki, Əfqanıstanda sülh missiyasında iştirak edən Gürcüstan da insan itkiləri yaşayır.
Mayk Pompeo bəyan edib ki, ABŞ həlak olanların qarşısında baş əyir və Gürcüstanın sülhməramlı əməliyyatlarda iştirakını yüksək qiymətləndirməklə ona “güclü və müdafiə qabiliyyətli müttəfiq kimi baxır”.
“Gürcüstan beynəlxalq təhlükəsizliyə və qərb dəyərlərinə töhvə verməyə hazır olduğunu sübut etmiş tərəfdaşdır. Gürcüstan Əfqanıstan missiyasında iştirak edən və NATO üzvü olmayan ən böyük podratçıdır. Gürcü hərbçiləri öz səlahiyyətlərinini əzmlə yerinə yetirirlər. 32 gürcü döyüşçü sülh və stabilliyin möhkəmlənməsi üçün öz canlarından keçib”, – ABŞ dövlət katibi bildirib.
Onun sözlərinə görə, ABŞ və Gürcüstan təhlükəsizlik, o cümlədən də qlobal terrorizm, terrorçuların Gürcüstan ərazisinə keçməsi və ya radioktiv maddələrin qaçaqmalçılıq yolu ilə ölkə ərazisinə gətirilməsi cəhdlərinin qarşısının alınmasında əməkdaşlığı dərinləşdirəcəklər.
“2016 və 2017-ci illərdə yerli və parlament seçkilərində gürcü xalqı yenə də öz Avro-Atlantik seçimini , o cümlədən də yaxın gələcəkdə NATO-ya daxil olmaq istəyini təsdiqlədi”, – Pompeo bildirib.
İqtisadiyyat və hüquqi dövlət
Giorgi Kvirikaşvilinin sözlərinə görə, ABŞ-ın köməyi ilə Gürcüstan investorlar üçün cəlbedci ölkələrdən birinə çevrilib. Onun dediyinə görə, dərinsulu Anakliya limanı kimi layihələrə özəl Amerika investitsiyalarının yatırılması Gürcüstan üçün olduqca vacibdir.
“Gürcüstan ABŞ-la qarşılıqlı faydalı ticarət əlaqələri qurmaq üçün zəruri institutları, strategiyası və biznes mühiti olan ölkələrdən biridir. Ölkələrimiz arasında azad ticarət yaranandan sonra PricewaterhouseCoopers şirkətinin apardığı araşdırmalar da təsdiq etdi ki, 5 il ərzində ABŞ idxalı 360 faiz arta bilər və nəticədə ABŞ-da yeni iş yerlərinin yaranmasına gətirib çıxarar”, – Giorgi Kvirkivişvili bildirib.
Mayk Pompeonun sözlərinə görə, ABŞ-ın Gürcüstana ismarıcı tamamilə aydındır: ABŞ qəti və sarsılmaz şəkildə Gürcüstanı dəstəkləyir və bu, gələcəkdə də dəyişməyəcək. Pompeo bəyan edib ki, Gürcüstanın təhlükəsizliyini təmin etmək üçün ən əsası açıq cəmiyyət və güclü iqtisadiyyatdır. O qeyd edib ki, müstəqil məhkəməyə, hesabatlı hökumətə, plüralizmə nail olmaq üçün qanunun aliliyini təmin etmək Gürcüstana fövqaladə dərəcədə vacibdir.
“ABŞ Gürcüstanın hər bir vətəndaşın səsinin həm siyasətdə, həm də KİV-də eşidilməsi üçün, hakimiyyət institutları arasında nəzarəti, eyni zamanda balans və güc bölgüsü mexanizmini qurmaq üçün göstərdiyi səyləri dəstəkləyir”, – ABŞ dövlət katibi Gürcüstanı müstəqilliyinin 100 illik yubileyi münasibətilə təbrik edərək bildirib.
