8 ay ərzində Gürcüstanı 6 milyon xarici qonaq ziyarət edib

2018-ci ilin yanvar-avqust aylarında Gürcüstanda 5 milyon 895 min 914 əcnəbi qonaq olub ki, bu da ötənilki göstəricidən 12,2 faiz çoxdur.

Turist olaraq Gürcüstanı 3 milyon 235 min 800 nəfər ziyarət edib ki, bu 2017-ci ilin yanvar-avqust aylarındakından 19,3 faiz çoxdur.

Bu göstəriciləri milli turizm administrasiyası açıqlayıb.

[Beynəlxalq təsnifata əsasən, turist olaraq yalnız o əcnəbi qonaqlar hesab edilir ki, onlar gəldikləri ölkədə 24 saatdan artıq qalır və yerli servisdən – restoranlardan, mehmanxanalardan və s. istifadə edirlər – JAMnews]

Son bir neçə il ərzində Gürcüstanda xarici qonaqların sayı durmadan artır. 2013-cü ildə Gürcüstana 5,4 milyon nəfər gəlib. Sonrakı üç il ərzində qonaqların sayı müvafiq olaraq 2, 7 və 8 faiz artıb. 2016-cı ildə Gürcüstanı 6,4 milyon nəfər ziyarət edib. Cari il rekord göstərici ilə əlamətdar olub – qonaqların artımı 12 faiz təşkil edib.

Avqust – ən turistik ay

Statistikaya görə, yalnız avqust ayında Gürcüstana 1294926 adam gəlib ki, bu da ötən ilin avqust ayındakından 9,8 faiz çoxdur. Bunlardan 737049 nəfəri turistdir ki, bu da 2017-ci ilin avqust ayında olandan 90 min nəfər artıqdır.

2018-ci ilin avqust ayında ən çox qonaq Rusiyadan, Azərbaycandan, Ermənistandan və Türkiyədən gəlib. Avropa İttifaqı ölkələrindən gələn turistlərin də sayı artıb, onların əksəriyyəti Rumıniya, Estoniya, Niderland və Almaniya vətəndaşlarıdır.

Turizm gəlirləri

İlkin göstəricilərə görə, 2018-ci ilin yanvar-iyun aylarında Gürcüstan xarici turistlərdən 1,361 milyard dollar əldə edib ki, bu da ötən ilin analoji dövründəkindən 28,9 faiz çoxdur.

2018-ci ilin birinci rübünün göstəricilərinə əsasən, turizmin ümumi daxili məhsulda payı 6,8 faiz təşkil edib. Ötən illə müqayisədə artım 16,6 faizdir.

2017-ci ildə xarici turizmdən Gürcüstan 2,7 milyard dollar əldə edib.

Milli turizm administrasiyası proqnozlaşdırır ki, ilin sonuna Gürcüstanı təxminən 8,5 milyon əcnəbi ziyarət edəcək, turizmdən gəlirlər isə 3 milard dolları keçəcək.