Aleksandr Akopov Rusiyaya olan rəğbətinə görə internetdə kəskin tənqidə məruz qalıb
Hromadske-nin materialları əsasında
Rusiya Xarici İşlər Nazirliyi dolu yağışının zədələdiyi təyyarəni eniş zolağını görmədən İstanbul Hava limanına əyər-əskiksiz endirə bilən Aleksandr Akopov adlı ukraynalı pilotu Rusiyaya dəvət edib.
Rusiya tərəfi dəvətin səbəbi kimi ona qarşı “vətənindəki tənqid”i göstərib. Bu barədə qurumun Facebook-dakı paylaşımında məlumat verilib.
Aleksandr Akopov Rusiyaya olan rəğbətinə görə internetdə kəskin tənqidə məruz qalıb. Buna səbəb isə onun Rusiya xarici işlər naziri Lavrovla özünün foto-kollajını Facebook profilinə yerləşdirməsi olub.
Qurumdan ukraynalı pilota peşəkarlığına görə təşəkkür ediblər, əlavə olaraq bildiriblər ki, “əgər ölkəsində daha kəskin tənqidə məruz qalarsa, Rusiya hər zaman onu qarşılamağa hazırdır.”
Xatırladaq ki, Ukrayna təyyarəsinin kapitanı olan Aleksandr Akopov ağır hava şərtləri altında, dolu yağışı səbəbilə ciddi zədə almış təyyarəni İstanbulun Atatürk Hava Limanına eniş xəttini görmədən sağ-salamat endirə bilmişdi.
Belə hava şəraitində AtlasGlobal Ukraynanın UR-AJC qeydiyyatlı Airbus A320 təyyarəsi bortunda 121 sərnişin və 6 ekipaj üzvü ilə İstanbuldan Ərcana (Şimali Kipr) doğru yol alıb.
Ukrayna prezidenti Pyotr Paraşenko pilotu “Şücaətə görə” ordeni ilə təltif edib.
Pilot özü isə Ukrayna mediasına profilində Lavrovun şəklinin olmasını belə izah edib:
“Bizim bələdçilərimizdən biri mənim şəklimi çəkib. Mən Sadəcə Lavrova oxşayıram. Bizim üz tipimiz və cizgilərimiz eynidir. Bəli, mən bu kollajı avatarıma qoydum, lakin bu, Donetsk döyüşləri başlayana qədər olub.”
Akopov vurğulayıb ki, nə ona zəng edən Pyotr Paraşenko, nə də infrastruktur naziri Vladimir Omelyan bu məsələ ilə bağlı irad bildirməyiblər.
