Ərəb turistlər Azərbaycanda nadir quşları ovlamağa davam edirlər: hakimiyyət susur – FOTO, VİDEO
Azərbaycanda ekoloqlar həyəcan təbili çalır: Qax Dövlət Təbiət Yasaqlığında Qırmızı Kitaba düşmüş quşların ovu davam edir. Hakimiyyət ərəb turistlərin əməlinə heç bir reaksiya vermir. Ekologiya və Təbii Sərvətlər Nazirliyinin nadir quşların qırılması ilə bağlı heç bir açıqlaması olmayıb.
JAMnews Bakıdan 400 kilometr məsafədə Qax Dövlət Təbiət Yasaqlığının ərazisində Acınohur düzündə ərəb turistlərin qanunsuz ovu haqda artıq yazmışdı. Rəsmi olaraq Azərbaycanda ov mövsümü 20201-ci il fevralın 28-də başa çatıb.
Novruzla bağlı bayram tətili başlayandan Azərbaycanın eko-fəalları durmadan ərəb ölkələrindən gələn turistlərin qoruq ərazisində qanunsuz əməllərini, Qırmızı Kitaba düşmüş quşların öldürülməsini əks etdirən yeni materiallar paylaşırlar.
Azərbaycanın Eco-front ekoloji təşkilatının aktivistləri bəzgək və bağrıqaraların ovlandığını əks etdirən fotolar və videolar paylaşıblar. Fotolarda təbiətdə cəmi 200 cüt qalmış Qafqaz durnasının öldürüldüyü də əks olunub.
- Ermənistanda hərbi vəziyyət rejimi ləğv edilib – müharibə bitəndən 4 ay sonra
- Azərbaycanda ictimai nəqliyyat problemi: metro nə vaxt açılacaq?
Azərbaycanın ekologiya və təbii sərvətlər nazirinin timsalında hakimiyyət baş verənlərə heç bir reaksiya vermir. Ekologiya nazirliyi qoruq ərazisində ov edən turistlərin cərimələndiyi haqda açıqlama ilə yetinib. Ov isə bu günə qədər davam edir.
Eco-front təşkilatının rəhbəri Cavid Ağanın sözlərinə görə, ərəblərin qoruq ərazisində qurduğu çadırları Azərbaycan polisləri qoruyur və bu yerlərə gedib çıxmaq ekoloqlar üçün çətindir. Sosial şəbəkələrdə yayılan fotoların və videoların çoxunu eko-aktivistlər ərəb ovçuların öz səhifələrindən götürüblər.
“Azərbaycanda Ekologiya və Təbii Sərvətlər Nazirliyi yoxdur. Muxtar Babayev özünə hörmət edirsə istefa versin!”, – Cavid Ağa Facebook səhifəsində yazıb.
