Հետխորհրդային տարածքում ընդհանուր 431 «օրենքով գող կա», նրանց 57-ը վրացիներ են" />

Վրաստանում գողական աշխարհի հետ կապերի համար կպատժեն

Հետխորհրդային տարածքում ընդհանուր 431 «օրենքով գող կա», նրանց 57-ը վրացիներ են

Վրաստանում խստացվում է «գողական աշխարհին պատկանելու» համար պատիժը, իսկ նրա հետ համագործակցությունը քրեորեն պատժելի է դառնում: Օրենսդրական նախաձեռնությունների փաթեթը կառավարությունն արդեն ներկայացրել է խորհրդարանի դիտարկմանը:

Փոփոխությունների համաձայն՝ «գողական աշխարհին պատկանելիության» համար 7-10 տարվա ազատազրկում է նախատեսվում գործող 5-8 տարվա փոխարեն: Խստացվում է պատիժը նաև «օրենքով գողերի» համար. գործող 7-10 տարվա ազատազրկումը կփոխարինվի 9-15 տարվա ազատազրկմամբ:

Օրենսդրության խստացումը կվերաբերի ոչ միայն հենց «գողական աշխարհին»: Քրեորեն պատժելի կլինի «քրեական աշխարհի» հետ ցանկացած «համագործակցություն»: Օրինակ, Վրաստանում լայնորեն տարածված է «օրենքով գողերի ներգրավմամբ» հարցեր լուծելու պրակտիկան: Այսուհետ գողական աշխարհի ներկայացուցչին որևէ վեճ կարգավորելու խնդրանքով դիմած անձն ինքն է պատասխանատվության ենթարկվելու՝ Քրեական օրենսգրքի համաձայն: Իսկ ներկայիս գործող օրենքը ենթադրում է միջնորդ հանդիսացող «օրենքով գողի» դեմ գործի հարուցում:

Օրենսդրական նախաձեռնությունն այլ նորարարություններ էլ է պարունակում: Օրինակ, եթե «օրենքով գողը» համաձայնի համագործակցել ծանր կամ առանձնակի ծանր հանցագործության հետաքննման հարցում, նա կազատվի քրեական պատասխանատվությունից:

Ներքին գործերի նախարար Գիորգի Գախարիայի խոսքով՝ «գողական աշխարհի» հետ կապերի համար պատժի խստացումը թելադրված է այն մարտահրավերներով, որոնց վերջերս բախվում է Վրաստանը: «Քրեական մտածելակերպն ու կազմակերպված հանցավորությունը լուրջ խոչընդոտներ են առաջացնում երկրի համար: Այդ թվում՝ տնտեսության զարգացման, առողջ ապրելակերպի ներդրման և այլ ուղղությունների համար», — կարծում է նա:

Օրենսդրական նախաձեռնության քննարկման ընթացքում վարչապետ Գիորգի Կվիրիկաշվիլին հայտարարեց, որ «Վրաստանում երբեք չի արմատավորվի գողական մտածելակերպը»: «Դա բացառված է: Այդ հարցի լուծման համար մենք գործելու ենք անզիջում կերպով և անողոքաբար, քանի որ խնդիրը վերաբերում է մեր քաղաքացիների շահերին, նրանց խաղաղ կյանքին, մեր երկրի ապագային», — ասել է Կվիրիկաշվիլին:

  • Պատկանելիությունը «գողական աշխարհին» և «օրենքով գողի» կարգավիճակը Վրաստանում քրեորեն պատժելի է դարձել 2005թ-ի դեկտեմբերից, երբ խորհրդարանը հաստատել է Քրեական օրենսգրքում արվող փոփոխությունները և ընդունել «Կազմակերպված հանցավորության և ռեկետի» մասին օրենքը:
  • «Փրայմ-կրիմ» ռուսական հայտնի կայքերից մեկում հաղորդագրություն է հրապարակվել, որում ասվում է, որ այսօր հետխորհրդային տարածքում մնացել է ընդամենը 431«օրենքով գող», որոնցից 57%-ը վրացիներ են:

 


Կարդալ ավելին JAMnews-ում