Երիտասարդներ, որոնք Հայաստանի հետ միասին նշում են իրենց 25-ամյակը" />

Անկախության հասակակիցները

Երիտասարդներ, որոնք Հայաստանի հետ միասին նշում են իրենց 25-ամյակը

1991թ. սեպտեմբերի 21-ին Հայաստանում տեղի ունեցավ հանրաքվե, որին մասնակցեց ընտրական իրավունք ունեցող բնակչության շուրջ 95 տոկոսը, և ավելի քան 99 տոկոսը «կողմ» քվեարկեց անկախ, ազատ և ինքնիշխան պետության հռչակմանը:

21.09.2016

25 տարեկան պետությունն ունի նաև իր անկախության սերունդը

Սոնա Մելիքջանյան, 25 տարեկան, սոցիոլոգ

Ամեն տարի, երբ մոտենում է անկախության օրը, հպարտությամբ հիշում եմ, որ երկիրս ունի ճիշտ նույն տարիքը, ինչ և ես: Անկախությունն ինձ համար նույնականացվում է ազատության հետ: Ինձ դուր է գալիս ապրել ազատ. անել այն ամենն, ինչ ճիշտ է ինձ համար և ինչը չի խախտում այլոց իրավունքները:

Ուրախանում և հպարտանում եմ, որ ես ծնվել եմ անկախ Հայաստանում և ունեմ անկախ ապրելու, մտածելու և գործելու հնարավորություն: Ինչպես ասել է Էյնշտեյնը, «հասարակության բարոյական առաջընթացը բացառապես կախված է մարդու անկախությունից»:

Միքայել Մալխասյան, 25 տարեկան, պատմաբան

Հայոց պետականության վերականգնումը մի քանի հարյուրամյակ շարունակ մեր ազգի տասնյակ սերունդների գերագույն փափագն ու նվիրական նպատակն է եղել, քանի որ հենց անկախ պետականությունն է դիտարկվել՝ որպես ազգի շարունակական գոյության և ուղղորդված զարգացման երաշխիք:

Ինձ համար ևս «անկախություն» հասկացությունն ասոցացվում և նույնացվում է «պետականություն» հասկացության հետ, որը հնարավորություն է տալիս կայուն զարգացում ապահովել: Անկախությունն ինձ հնարավորություն է տալիս զգալ միաժամանակ և՛ սեփական ազգային հասարակության, և՛ գլոբալիզացվող աշխարհի մասնիկը:

Մարիամ Մելքումյան, 25 տարեկան, հոգեբան

Ինձ համար անկախությունը ազատ ապրելու, կրթվելու ու ստեղծագործելու հնարավորթյույուն է, և այն սկսվում է ինձ համար ծննդավայրիցս՝ սահմանամերձ Բերդ աղաքից: Անկախությունը պահպանելու համար բոլորիցս պահանջվում է պարտաճանաչություն, պատասխանատվություն ու սեր սեփական երկրի ու անձի նկատմամբ: Սեփական դեմքն ու արժեքները պահպանելու համար գիտակցված անկախ է պետք ապրել: Ես երջանիկ եմ, որ ապրում եմ անկախ երկրում:

Արմեն Սիմոնյան, 25 տարեկան, աշխարհագետ

Երբ ունես հայրենիք ու ազատ ապրում ես անկախ հայրենիքումդ, պետք է առաջնորդվես այն պարզ գիտակցությամբ, որ պարտավոր ես, քո սուրբ պարտքն է ապահովել նրա պաշտպանութունը, նոր շունչ հաղորդել նրա զարգացմանը և լինել նրա արժանի զավակը:

Հայրենիքի անկախության և դրա զարգացման գրավականը, իմ կարծիքով, նոր սերնդի գիտելիքի աստիճանն է: Պետք է գնալ գիտության հետևից և ցանկացած մասնագիտություն ծառայեցնել հայրենիքի շահերին: Իմ մասնագիտությունը երկրաբանությունն է, և այն նպաստել է, որպեսզի լավ ճանաչեմ և ըստ արժանվույն գնահատեմ երկիրս, զգամ ինձ ամեն քարի ու թփի տերը:

Շնորհավորում եմ Անկախության տոնի առթիվ և մաղթում խաղաղություն Մայր Հայաստանին ու հայ ժողովրդին:

Տեսանյութը՝ Լուսի Սարգսյանի

Կադրեր «Անկախության սերունդ» համերգից, որը սեպտեմբերի 21-ի տեղի ունեցավ Երևանում, Դեմիրճյանի անվան Մարզահամերգային համալիրում: Նվագախմբի և երգչախմբի կազմում հանդես եկան անկախության սերնդի 1100 ներկայացուցիչ Երևանից, Հայաստանի մարզերից և Արցախից: Նախագծի հեղինակն է դիրիժոր Սերգեյ Սմբատյանը, որը ևս այս սերնդի ներկայացուցիչն է: Կատարվեցին հայ կոմպոզիտորների ստեղծագործություններ:

Հրապարալվել է՝ 21.09.2016


Կարդալ ավելին JAMnews-ում