ჰოლივუდში "ოსკარის" 90-ე დაჯილდოება გაიმართა
4 მარტს, ლოს-ანჯელესის დოლბის თეატრში, ამერიკის კინოაკადემიამ ოსკარის 90-ე ცერემონიის გამარჯვებულები გამოავლინა, იუწყება CNN.
საუკეთესო ფილმი გახდა გილიერმო დელ ტოროს სურათი „წყლის ფორმა“, რომელიც საიდუმლო სამეცნიერო ლაბორატორიის დამლაგებლისა და საცდელი არსების სიყვარულის შესახებ მოგვითხრობს. კინოაკადემიის გადაწყვეტილება მოულოდნელი აღმოჩნდა ბევრი ექსპერტისთვის, რომლებიც გამარჯვებას უწინასწარმეტველებდნენ ფილმს „სამი ბილბორდი ებინგის საზღვარზე, მისური“.
„წყლის ფორმამ“, მთავარი ჯილდოს გარდა, კიდევ სამ ნომინაციაში გაიმარჯვა, ხოლო გილიერმო დელ ტორო საუკეთესო რეჟისორად დაასახელეს.
„საუკეთესო უცხოენოვანის ფილმის“ კატეგორიაში გაიმარჯვა ჩილელი რეჟისორის ფილმმა „ფანტასტიკური ქალი“. ფილმი ბიზნესმენისა და ტრანსგენდერი ქალის ურთიერთობაზე გვიამბობს. ფილმში მთავარ როლს ტრანსგენდერი ქალი ასრულებს.
საუკეთესო სრულმეტრაჟიანი დოკუმენტური ფილმი გახდა „იკაროსი“, რომელიც ამერიკელმა ბრაიან ფოგელმა გადაიღო. ფილმი რუსულ სპორტში დოპინგის თემას ეხება. მათავარი გმირი – მოსკოვის ანტიდოპინგური სააგენტოს ყოფილი ხელმძღვანელი, გრიგორი როდჩენკოვია.
სამსახიობო სამუშაოსთვის ჯილდოები მიიღეს გარი ოლდმანმა („ბნელი დროება“) და ფრენსის მაკდორმანდმა („სამი ბილბორდი ებინგის საზღვარზე, მისური“). მაკდორმანდისთვის ეს უკვე მეორე „ოსკარია“ – პირველი მან 21 წლის წინ მიიღო ფილმისთვის „ფარგო“.
ცერემონიამ ისე ჩაიარა, რომ არ უხსენებიათ შარშანდელი სკანდალი, რომელიც გავლენიანი კინოპროდუსერის, ჰარვი ვაინშტაინის ირგვლივ ატყდა.
„გასაკიცხ საქციელს ვეღარ ავიტანთ. მსოფლიო გვიყურებს და ჩვენ სამაგალითოები უნდა ვიყოთ“, – განაცხადა ცერემონიის დასაწყისში წამყვანმა ჯიმი კიმელიმ